Թեքեյան կենտրոնում բացվել է արձակագիր, հրապարակախոս Բակուր Կարապետյանի «Արեւմտյան Հայաստանը մինչև 1915 թվականը. լուսանկարներում» խորագրով ցուցադրությունը, որը կտեւի մեկ ամիս:
Մեր զրույցում պարոն Կարապետյանն ընդգծեց՝ պետք է տեր կանգնենք մեր պատմությանը. «Եթե հիշողությունը ջնջում են, մենք ոչինչ ենք»: Նրանից տեղեկացանք, որ արխիվներից տասնյակ տարիներ մեծ դժվարությամբ հավաքել է 7000 լուսանկար, սակայն ցուցահանդեսին ներկայացված էր 110-ը։ Այդ լուսանկարներն ընդգրկում են աշխարհի հայկական բոլոր համայնքները:
Կարդացեք նաև
Բակուր Կարապետյանն ափսոսանքով նշեց, որ ցուցադրության այցելուների թիվը սպասվածից քիչ է, թեեւ հրավիրված էին մտավորականության եւ տարբեր ոլորտների ներկայացուցիչներ: Նա նշեց, որ շատ ցանկալի է հատկապես աշակերտների եւ ուսանողների ներկայությունը ցուցադրությանը։
«Պետք է տե՛ր կանգնենք մեր հիշողությանը, մեր արմատներին…Դրա համար կոչ եմ անում՝ այցելե՛ք ցուցադրությանը եւ զգացեք հա՛յ լինելու օրհնությունը» ,-ասաց նա:
Նաեւ հավելեց, որ դեռ շատ հետաքրքիր ցուցադրությունների գաղափարներ ունի, սակայն դրանք կյանքի կոչելու համար ֆինանսական աջակցության անհրաժեշտություն կա։
Պայծառ ԲԱԲԱՅԱՆ
