«Ի՞նչ է լինելու Ռուսաստանի հետ մեր էս վիճակը»,-Ստեփանավանում մի քաղաքացի հարցրեց ՀՀ վարչապետ Նիկոլ Փաշինյանին։
Ինչպես արդեն տեղեկացրել ենք, Նիկոլ Փաշինյանն ու ՔՊ-ականները «ուրախ ավտոբուսով» շրջում են Տաշիրով, Ստեփանավանով, Վանաձորով, Սպիտակով, Ապարանով։
Ստեփանավանում Նիկոլ Փաշինյանին մոտեցած քաղաքացին դժգոհեց, որ երեք օր առաջ իրեն ՌԴ-ից ՀՀ են ուղարկել ու պատմեց․ «Ես ՌԴ-ի քաղաքացի էի, մի քանի տարի առաջ հարցեր եղան, բռնեցին իմ անձնագիրը քրքրեցին, զրոյացրին։ Տեխնիկաներս մնաց էնտեղ, տունս՝ էնտեղ, կնիկ- երեխա՝ էնտեղ, մորս գերեզմանն՝ էնտեղ։ Քովիդի ժամանակ մերս մահացավ, չկարողացա բերել Հայաստան»։ Նիկոլ Փաշինյանն արձագանքեց․ «Ցավում եմ եղբայր, բայց ի՞նչ նկատի ունեք՝ մե՞նք ինչ պետք է անենք․․․ երևի անձնագրի մեջ իրավական խնդիր է եղել»։
Քաղաքացին էլ հակադարձեց․ «Չէ, ռուսներն ուղիղ ասում են, որ պետք չէր Պուտինի հետ տենց խոսել։ Հիմի ո՞նց հասկանանք՝ ի՞նչ է լինելու, մեռնելո՞ւ ենք, թե սաղ ենք մնալու»։ Փաշինյանն էլ հանգստացրեց՝ նախ կենդանի եք, երկրորդն էլ՝ Դուք եք ասում, որ Ձեր անձնագրի մեջ խնդիրներ են եղել։
Կարդացեք նաև
Քաղաքացին վրդովված ասաց․ «20 տարի ապրել եմ, խնդիր չի եղել»։ Փաշինյանն էլ ՝ էդ ի՞նչ կապ ունի՝ հիմա մենք պիտի գնանք էնտեղ, Ձեր՝ ապօրինի անձնագիր ստանալու համար բան անե՞նք։ Իսկ քաղաքացին ասաց․ «Ուզում ենք իմանալ՝ ռուսի հետ դզվելու է, թե՝ չէ»։ Նիկոլ Փաշինյանն էլ ի պատասխան նշեց․ «Ռուսի հետ բան չկա, ամեն ինչը դզված է, Դուք օրինական վարքագիծ ցուցաբերեք, ոչ մի պրոբլեմ չի լինի»։
Տաթև ՀԱՐՈՒԹՅՈՒՆՅԱՆ
