«Ես բարձրացրել եմ իմ ձայնը մի վարչակարգի դեմ, որը հայ ժողովրդին պահում է աղքատության մեջ, պատերազմի վախի ներքո և պառակտված վիճակում»,-«Ուժեղ Հայաստանի» կողմից անցկացվող Միասնության հանրահավաքի ժամանակ տեսաուղերձում հայտարարեց Սամվել Կարապետյանը։
Նա վստահեցրեց՝ մենք պետք է միանշանակ հաղթանակ տանենք ընտրություններում՝ հեռացնելով իշխանությունից մեր ազգը խայտառակող, մեր պետականության հիմքերը քանդող փոքրիկ խմբակին․ «Մենք բոլորս պատրաստ ենք ամեն ինչ զոհաբերել հանուն Հայաստանի, մինչդեռ Փաշինյանը ամեն ինչ զոհաբերում է հանուն իր աթոռի»։
Նա վստահեցրեց՝ Հայաստանը պետք է դառնա անվտանգ, խաղաղ, հարուստ, ուժեղ երկիր, որտեղ կառավարիչները ոչ թե դատարկում են բյուջեն ու լցնում սեփական գրպանները, այլ հակառակը՝ դատարկում են սեփական գրպանները հանուն մեր հայրենիքի բարեկեցության։
Կարդացեք նաև
Սամվել Կարապետյանը վստահեցրեց՝ Հայաստանը դարձնելու ենք բարեկեցության երկիր ու աղքատություն բառը թողնելու ենք անցյալում․ «Այս բոլոր խոստումների իրականացումը երաշխավորում եմ։ Վարչակարգը մարդկանց վախեցնում է պատերազմով։ Մի՞թե մենք թույլ ենք տալու, որ նա Հայաստանի համար ևս մեկ պատերազմ պարտվի, թույլ չենք տալու։ Իմ խոստումն է, որ մեր հաղթանակի և իմ կողմից վարչապետ պաշտոնը ստանձնելու դեպքում գալիք սեպտեմբերը և դրան հաջորդող յուրաքանչյուր ամիս խաղաղ է լինելու։ Մենք թույլ խաղաղությունը փոխարինելու ենք ուժեղ խաղաղությամբ։ Մենք այլևս թույլ չենք լինելու։ Մենք ուժեղ ենք լինելու Մոսկվայում, վերականգնելու ենք խաթարված հարաբերությունները, Վաշինգտոնում, Լոնդոնում, ինչպես նաև Պեկինում»։
Նա հորդորեց ճնշումներից ու հետապնդումներից ոչ մի պահ չհուսահատվել․ «Նրանք կարող են նույնիսկ մեզ ձերբակալել, կալանավորել, բայց նրանք կարող կանգնեցնել մեզ փոփոխություններ բերելու ճանապարհին։ Սրանց կեղծ ու անհասկանալի սրտիկները մենք փոխարինելու ենք մեր իրական, հայկական սրտերով։ Մենք երբեք չենք մոռանալու, որ Հայ առաքելական սուրբ եկեղեցին է մեր սիրտը, Արարատ լեռն է մեր սիրտը»։
Տեղեկացնենք, որ հանրահավաքի մասնակիցներն այս պահին քայլերթ են իրականացնում Երևանում։
Ազատության հրապարակում անցկացվող Միասնության հանրահավաքն ու քայլերթն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
