«Հանդիպման ընթացքում բարձրացրել ենք նաև ադրբեջանական պետական ԶԼՄ-ներում շրջանառվող հակահայկական նարատիվների հարցը»,- «Խաղաղության կամուրջ» նախաձեռնության հայաստանյան անդամների մամուլի ասուլիսի ժամանակ ասաց նախաձեռնության անդամ Նարեկ Մինասյանը՝ անդրադառնալով Գաբալայում տեղի ունեցած հանդիպմանը։
Ըստ նրա՝ թեև եթե համեմատում ենք ադրբեջանական տարբեր պետական և բարձրաստիճան պաշտոնյաների հռետորաբանությունը մեկ տարվա կտրվածքով, ունենք դրական դինամիկա, բայց դեռ հնչում են խնդրահարույց թեզեր․ «Սակայն նույն դրական դինամիկան չունենք ադրբեջանական պետական լրատվամիջոցների դաշտում։ Սա խնդրահարույց է և չի տեղավորվում խաղաղության գործընթացների տրամաբանության շրջանակում»։
«Խաղաղության կամուրջ» նախաձեռնության անդամ Սամվել Մելիքսեթյանն էլ կարծում է՝ ապաշրջափակման գործընթացն առկախված է նաև հայկական կողմի՝ աշխատանքներ չկատարելու պատճառով․ «Մենք Ադրբեջան այցի ժամանակ հասկացանք այդ երկրի տրանսպորտային կոմունիկացիաների տրամաբանությունը և տեխնիկական լուծումները։ Մենք Գաբալայից հասել ենք ՀՀ սահման Ղազախի շրջանում շատ ավելի կարճ ժամանակահատվածում՝ Վրաստան- Ադրբեջան միջպետական հատվածում, քան 170 կմ-ն ՀՀ տարածքով՝ Ոսկեպար-Երևան հատվածով։ Սա ցուցիչ է, թե ինչ որակի են մեր կոմունիկացիաները, ինչը միջազգային տրանզիտի պայմաններում կարևոր խնդիրներից է»։
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարները՝ Արեգ Քոչինյանի ֆեյսբուքյան էջից
