Աղբակույտեր, կոտրված զուգարանակոնքեր, գարշահոտություն ու կիսավեր պատեր. սա այն տեսարանն է, որին ամեն օր ականատես են լինում Կ.Դեմիրճյանի անվան մարզահամերգային համալիր տանող ստորգետնյա անցումից օգտվողները:
Դեռևս 2025թ. հունվարին Երևանի քաղաքապետարանը հայտարարեց, որ մարզահամերգային համալիրի ստորգետնյա անցումը բարեկարգելու նպատակով քաղաքապետ Տիգրան Ավինյանի թույլտվությամբ քանդվել են գետնանցումում առկա ինքնակամ շինությունները: Թեև այս հայտարարությունից անցել է ավելի քան մեկ տարի, սակայն բարեկարգման աշխատանքներ այդպես էլ չեն իրականացվել. միայն քանդվել են գիշերակացի կամ այլ նպատակների համար ծառայող շինությունները՝ տարածքը թողնելով անմխիթար վիճակում:
Դեռևս հայտնի չէ, թե երբ կմաքրվի ու կբարեկարգվի գետնանցումը: Երևանի քաղաքապետարանն այս խնդրի վերաբերյալ հարցումն ուղարկել էր Աջափնյակ վարչական շրջանի աշխատակազմին, որտեղից էլ հայտնեցին, որ քաղաքապետարանում ներկայումս քննարկումներ են ընթանում՝ նախագծի պատրաստման շուրջ: Այնուամենայնիվ, աշխատանքների իրականացման համար հստակեցվելիք բյուջեի վերաբերյալ տեղեկատվություն դեռևս առկա չէ:
Կ.Դեմիրճյանի անվան մարզահամերգային համալիրում միջոցառումների ու համերգների պակաս չկա, սակայն այնտեղ հասնելու համար շատերը ստիպված են արագ քայլերով ու շունչը պահած անցնել ստորգետնյա անցումը՝ փորձելով րոպե առաջ ազատվել զազրելի տեսարանից: Նույն իրավիճակն էր նաև ապրիլի 4-ին՝ ՀՀ վարչապետի կազմակերպած «Վարչաբենդ»-ի համերգին:
Կարդացեք նաև
Ի դեպ՝ այսօր էլ Կ.Դեմիրճյանի անվան մարզահամերգային համալիրում աշխարհահռչակ դաշնակահար Լանգ Լանգի համերգն է, որին, ամենայն հավանականությամբ, կայցելեն նաև օտարերկրյա հյուրեր:
Նշենք, որ Երևանի կենտրոնում բավական մեծ ծավալի շինարարական աշխատանքներ են ընթանում, այդ թվում՝ բարեկարգման նպատակով ամբողջությամբ քանդվում է Ամիրյան փողոցը, որի վիճակը, այնուամենայնիվ, անմխիթար չէր կարելի համարել:
Նարա ՄԱՐՏԻՐՈՍՅԱՆ
Տեսանյութը նկարվել է ապրիլի 4-ին:
