«Ամենաառաջին օրվանից, երբ այդ հանցանքը կատարվեց, իմ այնտեղ չգտնվելը, տանը լինելը մարդկանց կողմից հաստատվել է։ Հետո մի հատ սցենար գրվեց, ու այդ սցենարով որոշվեց, որ ես…»,- այսօր առաջին ատյանի ընդհանուր իրավասության քրեական դատարանում դատավոր Մուշեղ Արամյանի նախագահությամբ Փարաքարի նախկին համայնքապետ Վալոդյա Գրիգորյանի սպանության գործով դատական նիստում ասաց մեղադրյալներից Նարեկ Օհանյանը։
Նա իր այս հայտարարությունն արեց հանրային մեղադրողի կողմից ներկայացված խափանման միջոց կալանքը ևս երեք ամսով երկարաձգելու միջնորդության քննարկման ժամանակ։ Դատարանը նրան ընդհատեց՝ ասելով, որ իր հայտարարությունները կարող են լինել միայն խափանման միջոցի վերաբերյալ։
«Բա ուրիշ ե՞րբ խոսեմ այս ամեն ինչի մասին։ Կալանքի մեջ մնալով՝ իմ խնդիրներն ավելի են շատանում։ Ես ոչ խնդիր եմ ունեցել Վալոդյայի, ո՛չ էլ Կարենի հետ․ առավել ևս վրեժխնդրության ցանկություն չի եղել։ Բոլորը գիտեն՝ վրեժխնդրության հասկացությունը վերացել է իմ մոտ։ Էսքանից հետո ասում եք՝ մի խոսացեք, բա ես ե՞րբ խոսեմ, որ անիմաստ կալանքի տակ եմ»,- ասաց Օհանյանը։
Հիշեցնենք, որ դատարանն այսօր բավարարեց հանրային մեղադրողի միջնորդությունն ու գործով երկու մեղադրյալների կալանքը երկարաձգեց ևս երեք ամսով։
Կարդացեք նաև
Հիշեցնենք, որ գործով անցնում են՝ 20-ամյա Գևորգ Հարությունյանը և Նարեկ Օհանյանը։
Վալոդյա Գրիգորյանը սպանվել էր 2025 թվականի սեպտեմբերի 23-ին Մերձավանի իր նորակառույց տան մոտ։ Նրա հետ միասին սպանվել էր նաև քրեական ոստիկանության ծառայող Կարեն Աբրահամյանը։
Արփինե ՍԻՄՈՆՅԱՆ
