Վարչական դատարանում Արմեն Ներսիսյանի նախագահությամբ Գլխավոր դատախազության՝ ընդդեմ Կադաստրի կոմիտեի, երրորդ անձ ՀՀ գրողների միություն ՀԿ «Սևան» ստեղծագործական տան 1993 թվականի փետրվարի 26-ի կադաստրում պետական գրանցումը անվավեր ճանաչելու պահանջի մասին դատական նիստը չկայացավ դատախազության և կադաստրի ներկայացուցիչների չներկայանալու պատճառով։
Երրորդ անձի ներկայացուցիչ Լարիսա Բաղդասարյանը նշեց, որ հաշվի առնելով, որ նախորդ դատական նիստը հետաձգվեց՝ պայմանավորված այն հանգամանքով, որ դատարանը ապացույցներ էր պահանջել իրենցից և, եթե չի սխալվում, նաև դատախազությունից, իրենց դիրքորոշման հետ կապված դատախազության ներկայացուցչի դիրքորոշումը նշանակություն ունի, ինչպես նաև դատախազությունը պետք է նոր ապացույցներ ներկայացնի։ Եվ այդ համատեքստում գտնում է, որ այս պահի դրությամբ քննությանը խոչընդոտ կա։
Դատարանը, հաշվի առնելով կողմի դիրքորոշումը, հնարավոր չգտավ շարունակել գործի քննությունը առանց գլխավոր դատախազության ներկայության։
Ամեն բան ընթանում էր սովորական հունով, սակայն դատավորը Aravot.am-ի լրագրողից ճշտելով, որ նա աուդիո ձայնագրություն է իրականացնում, բավականին անբարյացակամ տոնով ասաց․ «Հեռախոսի ձայնագրությունը միացվա՞ծ է։ Բա, ձեզ ո՞վ է թույլ տվել, հարցրե՞լ եք դատարանին։ Ապահովեք, որ անջատվի, թե չէ դուրս եք գալու դահլիճից»։ Լրագրողը տեղեկացրեց, որ ինքը դռնբաց նիստում իրականացնում է աուդիո ձայնագրություն, ինչը օրենքով արգելված չէ, և դրա համար դատարանից հատուկ թույլտվություն ստանալու պարտադրանք չկա։
Կարդացեք նաև
«Ես նման բաներ չեմ սիրում։ Հարցրեք՝ թույլ կտա՞մ՝ կձայնագրեք։ Դա մեկ։ Երկրորդը, ասենք թե ձայնագրեցիք, դրանից ի՞նչ է փոխվում»։ Դրանից հետո կարճատև լարված երկխոսություն տեղի ունեցավ դատավորի և Aravot.am-ի ու Հ2 հեռուստաընկերության լրագրողի և օպերատորի միջև, որից հետո չորրորդ իշխանության ներկայացուցիչները նպատակահարմար գտան լքել դատական նիստի դահլիճը։
Նիստից հետո լրագրողները փաստաբան Լարիսա Բաղդասարյանից ճշտեցին, թե արդյո՞ք ԶԼՄ-ները իրավունք չունեն դռնբաց դատական նիստում առանց լրացուցիչ թույլտվության աուդիո ձայնագրություն իրականացնել։ Փաստաբանը ևս մեկ անգամ աչքի անցկացրեց ՀՀ վարչական դատավարության օրենսգիրքը, որի 100-րդ հոդվածի իմաստով միջնորդություն անհրաժեշտ է ներկայացնել բացառապես այն դեպքերում, երբ պետք է իրականացվի տեսաձայնագրություն։ Իսկ աուդիո ձայնագրության մասով նման արգելող կարգավորում ամրագրված չէ։
Աշոտ ՀԱԿՈԲՅԱՆ
