Կանանց 86 կգ քաշայինների պայքարում մենք ունեինք երկու ներկայացուցիչ՝ Էմմա Պողոսյանը, որը պարզապես փայլեց, ու Լիանա Գյուրջյանը։
Տակավին երիտասարդ Էմման երկու վարժություններում էլ անթերի կատարեց իր բոլոր մոտեցումները։ Սկսելով պոկումում 102 կգ-ից՝ նա այնուհետև սանձեց 105, ապա 107 կիլոգրամները և արժանացավ փոքր բրոնզե մեդալի։ Ոգևորված այս հաջողությունից՝ Էմման ավելի վստահ հանդես եկավ հրում վարժությունում։
Նա իր կամքին ենթարկեց սկզբում 132, ապա նաև 134 կիլոգրամները, սակայն իր երկու ահեղ մրցակիցներին շրջանցելու համար նրանից պահանջվում էր վերջին մոտեցմամբ բարձրացնել 141 կգ, ինչն էլ արեց մեկ շնչով ու թեթևությամբ՝ նվաճելով ինչպես փոքր ոսկին, այնպես էլ երկամարտի արդյունքով Եվրոպայի չեմպիոնի կոչումը՝ ցույց տալով 248 կգ։
Կարդացեք նաև
Պայքարի սկիզբը անհաջող ստացվեց Լիանա Գյուրջյանի համար, որը պոկում վարժությունում բավարարվեց ընդամենը 9-րդ տեղով՝ 101 կգ։ Սակայն նա հրումում որոշակիորեն կարողացավ վերադարձնել ինքնակառավարումը և ի վերջո 135 կիլոգրամով վաստակեց փոքր արծաթը, իսկ երկամարտում՝ 236 կգ-ով բարձրացավ 5-րդ հորիզոնական։
Աշոտ ՀԱԿՈԲՅԱՆ
