Հայտարարություն` Հայաստանում 2026 թվականի խորհրդարանական ընտրությունների նախընտրական քարոզարշավի ընթացքում հոգեկան առողջության շահարկման վերաբերյալ
Հելսինկյան քաղաքացիական ասամբլեայի Վանաձորի գրասենյակը ներքոստորագրյալ հասարակական կազմակերպությունների հետ, խստորեն դատապարտում է Հայաստանում 2026 թվականի խորհրդարանական ընտրությունների նախընտրական քարոզարշավի ընթացքում հոգեկան առողջության շահարկումը։
Վերջին օրերին թե՛ սոցիալական հարթակներում և թե՛ ընտրողների հետ հանդիպումներին առավել հաճախ են հոգեկան առողջության հետ կապված վիրավորական ձևակերպումները, որոնք օգտագործվում են քաղաքական հակառակորդներին արժեզրկելու և նսեմացնելու համար։
Նման խոսույթն ամբողջությամբ հակասում է ժողովրդավարական և իրավական պետության արժեքներին։
Ավելին, հոգեկան առողջության շահարկումն անթույլատրելի է, քանի որ վերարտադրում է խարանը, խտրական վերաբերմունքը, նպաստում վախի և մեկուսացման մթնոլորտի խորացմանը։
Կարդացեք նաև
Հիշեցնում ենք, որ հոգեկան առողջությունը հանրային առողջության կարևոր բաղադրիչ է և պաշտպանված է մարդու հիմնարար իրավունքներով։ Քաղաքական գործիչները, նրանց աջակիցներն ու համակիրները չպետք է թույլ տան մարդու իրավունքների խախտումների հանգեցնող խոսույթ։ Վերջիններս պոզիտիվ պարտավորություն ունեն իրենց խոսքում և գործողություններում բացառելու խտրականության ու խարանի վերարտադրումը։
Հաշվի առնելով վերոգրյալը՝ բոլոր քաղաքական ուժերից և թեկնածուներից պահանջում ենք՝ զերծ մնալ հոգեկան առողջությունը քաղաքական պայքարում շահարկելուց և հանրային բանավեճում պահպանել մարդու արժանապատվության նկատմամբ հարգանքը։
Հելսինկյան քաղաքացիական ասամբլեայի Վանաձորի գրասենյակ
Ժողովրդավարության զարգացման հիմնադրամ
«Հաշմանդամություն ունեցող անձանց իրավունքների օրակարգ» ՀԿ
Հոգեկան առողջության հայկական ասոցիացիա ՀԿ
Կանանի սոցիալ-հոգեբանական կենտրոն ՀԿ
«Հավասարության ուղի» հաշմանդամություն ունեցող անձանց իրավունքների պաշտպանության ՀԿ
«Կարիտաս Արեգակ» Բարեգործական Հիմնադրամ
Ստեփանավանի տեղեկատվական կենտրոն ԲՀԿ
