Մայիսի 27-ից ՀՀ հակակոռուպցիոն քրեական դատարանում է Կարեն Փիրումյանի, Անդրանիկ Երեմյանի, Դերենիկ Պողոսյանի, Մարիամ Թագվորյանի, Ռուզաննա Աթոյանի վերաբերյալ քրեական գործի վարույթը։ Դատավորն է Լևոն Պետրոսյանը, հանրային մեղադրողն է Ա Կոստանյանը։
Կարեն Փիրումյանին մեղադրանք է առաջադրվել այն բանի համար, որ նա 2025 թ․ հոկտեմբերի 23-ից մինչև 2026 թ․մարտի 2-ը հանդիսանալով «Մեր ձևով» ազգային արժեքների պահպանության հասարակական կազմակերպության գրասենյակի ղեկավար, փաստացի իրականացրել է Նոր Նորք համայնքի Վիլնյուսի փողոցի 35/5 հասցեում գտնվող՝ «Ուժեղ Հայաստան» կուսակցության գրասենյակի պատասխանատուի գործառույթները, որի ընթացքում հիշյալ կուսակցության օգտին քվեարկելու պայմանով Ա Երեմյանին, Ռ․Աթոյանին, Մ. Թագվորյանին և Դ․Պողոսյանին տվել է ընտրակաշառք, ինչպես նաև խախտելով ընտրությունների ժամանակ բարեգործության արգելքը, Արթուր Ղարիբյանի վիրահատության ծախսերը հոգալու նպատակով բարեգործության անվան տակ վերջինիս անհատույց տվել է 200.000 ՀՀ դրամ գումար:
Մեղադրյալներից երկուսի նկատմամբ խափանման միջոց էր ընտրվել կալանավորումը, մեկի նկատմամբ տնային կալանքը, երկուսի նկատմամբ՝ բացակայելու արգելքը։
Գործը քննվել էր ՀՀ հակակոռուպցիոն կոմիտեում։
Կարդացեք նաև
Հունիսի 10-ի դատական նիստին քննվել էր հանրային մեղադրողի և մեղադրյալ Դերենիկ Պողոսյանի պաշտպան Լիպարիտ Սիմոնյանի միջնորդությունները։ Դատարանը մերժել էր դատախազի միջնորդությունը, բավարարել պաշտպան Սիմոնյանի միջնորդությունը։ Դատարանը որոշել էր մեղադրյալի նկատմամբ վարչական հսկողությունն իրականացնել առանց էլեկտրոնային միջոցների, պարտավորեցրել էր Դերենիկ Պողոսյանին շաբաթը մեկ գրանցվել ՀՀ պրոբացիայի Երևանի քաղաքային մարմնում։ Դատարանն արգելել է նաև հաղորդակցվել քրեական գործով անցնող անձանց հետ։
Ռուզան ՄԻՆԱՍՅԱՆ
«Առավոտ» օրաթերթ
02.07.2026
