Ermenihaber. ՆԱՏՕ-ի 36-րդ գագաթնաժողովի շրջանակում պաշտոնական այցով Անկարայում գտնվող ԱՄՆ նախագահ Դոնալդ Թրամփը և Թուրքիայի նախագահ Ռեջեփ Թայիփ Էրդողանը հանդես են եկել հայտարարություններով:
Թրամփը բարձր է գնահատել Թուրքիայի ռազմական ուժն ու Էրդողանի առաջնորդությունը՝ ընդգծելով. «Եթե չլիներ հարգարժան նախագահը, ես չէի մասնակցի այս գագաթնաժողովին»:
ԱՄՆ նախագահն անդրադարձել է նաև երկկողմ հարաբերություններում առկա խնդրահարույց հարցերին՝ մասնավորապես հայտարարելով «Սպառնալիքներին պատժամիջոցների միջոցով հակազդելու մասին ԱՄՆ օրենքի » (CAATSA) շրջանակներում Թուրքիայի դեմ սահմանված պատժամիջոցները չեղարկելու որոշման մասին:
«Մենք չեղարկելու ենք այդ պատժամիջոցները: Դա կարող եմ հստակ ասել: Մենք չենք ցանկանում, որ մեր ընկերները պատժամիջոցների տակ լինեն: Մենք մեր ընկերների նկատմամբ պատժամիջոցներ չենք կիրառում»,- նշել է Թրամփը:
Կարդացեք նաև
ԱՄՆ նախագահը հավելել է, որ որոշմանը կողմ են նաև պատվիրակության կազմում Անկարա ժամանած բարձրաստիճան պաշտոնյաները, այդ թվում՝ ԱՄՆ պետքարտուղար Մարկո Ռուբիոն:
Հիշեցնենք՝ այս պատժամիջոցների արդյունքում Թուրքիան տարիներ շարունակ չի կարողացել ձեռք բերել F-35 կործանիչները: Նախքան Թուրքիա մեկնելը ԱՄՆ նախագահը ակնարկել էր թեմայի վերաբերյալ դրական որոշում ունենալու մասին:
