ՀՀ նախկին ոստիկանապետ Վալերի Օսիպյանի ենթադրյալ ապօրինի ծագման գույքի բռնագանձման գործով դատական նիստում այսօր հանրային մեղադրողը միջնորդեց թույլատրել փոխել հայցի առարկան և հիմքը։
Ըստ հանրային մեղադրողի՝ ՆԳՆ-ից ստացվել է տեղեկություն անշարժ գույքի նվիրատվության վերաբերյալ։ Ստացված նոր տվյալները ներառվել են հայցի հիմքում և հաշվարկներում, ինչի հետևանքով առաջացել է հայցի հիմքն ու առարկան փոխելու անհրաժեշտություն։
Մասնավորապես, դատախազությունը պահանջում է բռնագանձել Վալերի Օսիպյանի ՝ Կենտրոն վարչական շրջանի Բուզանդ փողոցում գտնվող անշարժ գույքը կամ դրա միջին շուկայական արժեքը, ինչպես նաև մինչև դատարանի վերջնական ակտի օրինական ուժի մեջ մտնելը այդ գույքի օգտագործումից ստացված եկամուտը, Նուբարաշենում գտնվող բնակարանի 2/5-րդ բաժնեմասը, Ծաղկաձորում գտնվող բնակարանը կամ դրա անհնարինության դեպքում միջին շուկայական արժեքը, ինչպես նաև «Ակբա» բանկում առկա 16 320 ԱՄՆ դոլարի ավանդը։ Հայցում ներառվել է նաև 48 միլիոն 891 հազար դրամի պահանջ, որը, ըստ հանրային մեղադրողի, չի հիմնավորվում օրինական եկամուտներով։
Կարդացեք նաև
Հանրային մեղադրողը նշեց, որ 2015 թվականին ոստիկանության և Վալերի Օսիպյանի միջև կնքվել է նվիրատվության պայմանագիր, որի հիման վրա Ծաղկաձորի բնակարանը փոխանցվել է Օսիպյանին։
Նա ասաց, որ կատարվել է իրավական հիմքերի ուսումնասիրություն, ՆԳՆ-ից ստացվել են համապատասխան տեղեկությունները, ոստիկանապետի հրամանը և նվիրատվության պայմանագիրը։ Ուսումնասիրության արդյունքում պարզվել է, որ նվիրատվությունը չի բավարարել իրավական չափանիշներին։ Ընդունված են կառավարության որոշումներ, որոնք սահմանում են, թե որ դեպքերում կարող են զինծառայողներին կամ իրավապահ համակարգի ծառայողներին անհատույց նվիրատվություններ կատարվել։
Վալերի Օսիպյանի ներկայացուցիչը նշեց, որ ապօրինի ծագման գույք է համարվում այն գույքը, որի ձեռքբերումը չի հիմնավորվում օրինական եկամուտներով։ Տվյալ դեպքում Ծաղկաձորի գույքը ձեռք է բերվել պետության կողմից անհատույց նվիրատվության պայմանագրի հիման վրա։
Պատասխանող կողմը հարց բարձրացրեց, թե եթե նույնիսկ նվիրատվության գործընթացում խախտումներ են եղել, դա ինչ նշանակություն ունի գույքն ապօրինի ծագում ունեցող համարելու տեսանկյունից։
Ի պատասխան՝ հանրային մեղադրողը նշեց, որ քանի որ հայցը ներկայացվել է կոռուպցիայի դեմ պայքարի շրջանակում, նվիրատվության իրավաչափությունը, ըստ ձևավորված դատական պրակտիկայի, պետք է գնահատման առարկա դառնա։ Նրա խոսքով՝ քիչ չեն դեպքերը, երբ անհատույց գործարքներ են կատարվում կամ անձինք նվերներ են ստանում՝ դրանց իրական աղբյուրը կամ այն հանգամանքը, որ դրանք փաստացի ձեռք են բերվել վճարովի հիմունքներով, քողարկելու նպատակով։
«Մենք չգիտենք, թե ինչ պայմաններում և ինչի համար է անձը ստացել այդ բնակարանը, հատկապես եթե ծառայողական անհրաժեշտություն չի եղել, քանի որ, ըստ էության, անձը դրա կարիքը չի ունեցել»,- նշեց հանրային մեղադրողը։
Դատարանը որոշեց միջնորդության վերաբերյալ որոշում կայացնել առանձին դատական ակտով։ Պատասխանող կողմը խնդրեց տրամադրել երկու ամիս ժամանակ՝ հանրային մեղադրողի ներկայացրած նոր հաշվարկներին և հայցի փոփոխված հիմքին ու առարկային ծանոթանալու համար։ Դատական նիստը հետաձգվեց:
Արփինե ՍԻՄՈՆՅԱՆ
