Սուրեն Բելյանի և Հովհաննես Իշխանյանի «Ծիծեռնակի հավատի կենացը» ֆիլմը ցուցադրվեց Ոսկե ծիրան միջազգային կինոփառատոնի շրջանակում։ Հովհաննես Իշխանյանը ցուցադրությունը նվիրեց իրենց հավատի համար ապօրինի բանտարկված Ավետիք Չալաբյանին, Կարապետ Պողոսյանին և բոլոր քաղբանտարկյալներին։ «Ավետիք Չալաբյանն այս ֆիլմի պրոդյուսերն է, իսկ Կարապետ Պողոսյանը՝ ֆիլմի հերոսներից մեկը, որոնք պիտի այսօր դահլիճից նայեին ֆիլմը, բայց ապօրինի կալանավորված են»,- ասաց նա։
«Սա ինձ համար ոչ միայն առաջին ֆիլմն էր, այլ նաև ֆիլմ է, որտեղ ճանաչեցի ինքս ինձ նորից ու մեր դարերի անցածը։ Մենք տեսնում ենք երկու ընտանիք, որոնք, բնականաբար, դարեր շարունակ չեն ապրել, բայց ապրել են այն, ինչը մենք դարեր շարունակ ապրում ենք։ Ու ֆիլմում փորձում ենք ցույց տալ ու հավատալ նրան, որ ծիծեռնակը պետք է մնա իր բնում»,- նշեց Սուրեն Բելյանը։
Նշենք, որ ֆիլմն անդրադառնում է Հայաստանում ադրբեջանցիների վերաբնակեցման վտանգներին և ներկայացվում է, թե ինչ կարող է նշանակել համակեցությունն առկա թշնամանքի պայմաններում։
Հավելենք, որ Հովհաննես Իշխանյանն ավելի քան տասը տարի զբաղվում է վավերագրական ֆիլմերով։ Ինչ վերաբերում է Սուրեն Բելյանին, սա նրա առաջին մեծ աշխատանքն է։
Կարդացեք նաև
Գոհար ՀԱԿՈԲՅԱՆ
