Երեւանյան 23-րդ «Ոսկե Ծիրան» միջազգային կինոփառատոնը «Վարպետ» մրցանակին արժանացրեց նաեւ «Օսկար»-ակիր «Մեղսավորները» ֆիլմի պրոդյուսեր եւ փառատոնի հատուկ հյուր Սեւ Օհանյանին: Նա բավականին հուզվել էր հայրենիքում արժանացած մեծարումից։
«Տարբեր երկրներում մեծ բեմերի վրա շատ մրցանակներ եմ ստացել, բայց հավատացեք ինձ՝ այն, որ ցուցադրել եմ իմ ֆիլմերը Հայաստանում, եւ այժմ մրցանակ եմ ստանում Հայաստանում, ինձ համար ավելի շատ արժեք ունի»,- բեմից հուզված հայտարարեց Սեւ Օհանյանը:
Լուսանկարը՝ gaiff.am-ից
Ավելի վաղ պրոդյուսերն ասել էր, որ բառացիորեն երազել է, որ իր ֆիլմերից գոնե մեկը ցուցադրվի «Ոսկե ծիրանին», եւ հիմա իրեն դրախտում է զգում։
«Ոսկե ծիրանի» շրջանակում կայացել էր Սեւ Օհանյանի առաջին ռեժիսորական աշխատանքի՝ «Իմ մեծ չաղ հայկական ընտանիքը» (2008) կատակերգության երեւանյան պրեմիերան, որը նա նկարել էր 19 տարեկանում՝ հայրիկի տնային տեսախցիկով: Հայրն այդ ժամանակ որդու հետ աշխատել էր որպես պրոդյուսեր, իսկ մայրը կարել էր այն էկրանը, որի վրա ֆիլմը ցուցադրվել էր Գլենդելի ավագ դպրոցում։
Կարդացեք նաև
Հավելենք, որ 2010 թվականից Սեւ Օհանյանն արտադրել կամ համարտադրել է շուրջ 20 ֆիլմ։ Նրա նախագծերի շարքում են Անիշ Չագանտիի «Որոնումը», որը 75 մլն դոլարի եկամուտ է ունեցել, Շաքա Քինգի՝ 5 «Օսկարի» առաջադրված «Հուդան և սև մեսիան», ինչպես նաեւ ռեժիսոր Ռայան Քուգլերի «Մեղսավորները», որն «Օսկարի» պատմության մեջ երբեւէ ամենաշատ պարգեւների առաջադրված ֆիլմ է։
Գոհար ՀԱԿՈԲՅԱՆ
Լուսանկարները՝ «Ոսկե ծիրանի» կայքից եւ ֆեյսբուքյան էջից։
