«Հայաստանում քաղբանտարկյալ հանդիսացող մեր գործընկեր Դավիթ Ղազինյանը հանդիպել է հերթական՝ իրավունքի նկատմամբ նսեմացնող, ինչ-որ տեղ ծաղրող վարքագծի։ Դատախազությունն ու քննչական մարմինը, քաջատեղյակ լինելով, որ այսօր Դավիթ Ղազինյանը ձեռք է բերելու պատգամավորի կարգավիճակը, կայծակնային, ռեկորդային արագությամբ հասցրել են գործն ուղարկել դատարան։ Այն պարագայում, որ բոլոր տվյալները փոխանցվել էին թե՛ քննչականին, թե՛ դատախազությանը»,- անդրադառնալով «Ուժեղ Հայաստան» կուսակցությունների դաշինքի պատգամավորի թեկնածու Դավիթ Ղազինյանի նկատմամբ նախաձեռնված քրեական վարույթը հաստատված մեղադրական եզրակացությամբ դատախազության կողմից Հակակոռուպցիոն դատարան ուղարկելու գործընթացին՝ լրագրողներին ասաց «Ուժեղ Հայաստանի» ներկայացուցիչ, պատգամավորի թեկնածու Արամ Վարդևանյանը։
Նա ասաց, որ վարույթ իրականացնող մարմինը Ղազինյանի խափանման միջոցի ընտրության հիմքում դնում էր խոչընդոտելու ռիսկը, իսկ պաշտպանական թիմը միջնորդել է Ղազինյանին հարցաքննել, առերեսում անել վարույթի շրջանակում, սակայն որևէ գործողություն չի արվել։
«Ինչո՞ւ չի արվել, որ մինչև այս նիստը գործն ամեն կերպ ուղարկեն դատարան։ Որ երբ այս նիստն ավարտվի, ու մեր ձեռքի տակ լինի արձանագրություն նրա վերաբերյալ, որ Ղազինյանը պատգամավոր է ու չի կարող լինել կալանավորված, վերջիններս ասեն՝ իրենք լիազորություն չունեն խափանման միջոց կալանքը վերացնել, քանի որ գործն արդեն դատարանում է։ Սա աբսուրդի նոր նշաձող է»,- ասաց Վարդևանյանը:
Կարդացեք նաև
Մյուս աբսուրդը, ըստ Վարդևանյանի, այսօր ԿԸՀ-ում նախատեսված՝ 17:00-ի նիստն է, որի ընթացքում հանձնաժողովը քննելու է «Ուժեղ Հայաստանի» պատգամավորի թեկնածու Նարեկ Կարապետյանին վերաբերող դատախազության ներկայացրած միջնորդությունը.
«Ոչ մի ուրիշ տվյալ բացահայտված չէ։ Նարեկ Կարապետյանին վերաբերող միջնորդություն է: 15:00-ին Նարեկ Կարապետյանը ձեռք է բերելու պատգամավորի կարգավիճակ, ունենալու է անձեռնմխելիության ամենաբարձր աստիճանը, բայց ԿԸՀ-ն իր վերաբերյալ միջնորդություն է քննելու։ Ի՞նչ է լինելու դրա ճակատագիրը. հերթական քաղաքական հետապնդման միջամտություն, ամեն կերպ նրա գործունեությունը խոչընդոտելու գործողություն»։
Վարդևանյանն ասաց՝ տեղեկություն չունի, թե ինչ քրեական վարույթի շրջանակում է Նարեկ Կարապետյանի վերաբերյալ միջնորդությունը բերվելու ԿԸՀ: Բայց ասաց՝ Կարապետյանը դեմ է, որ փաստաբանական թիմը ժամկետ խնդրի, որպեսզի ծանոթանա նյութերին ու դիրքորոշում հայտնի։
Արփինե ՍԻՄՈՆՅԱՆ
Արխիվային լուսանկարը՝ Նարեկ Կարապետյանի ֆեյսբուքյան էջից
