«Ապրում ենք մի ժամանակաշրջանում, երբ խոսքի, լայքի, հայացքի, հայ մնալու իրավունքի համար մարդկանց բռնում, նստեցնում են»,- Սիրահարների այգում «Ընտրական իրավունքի սահմանափակումները՝ միահեծան իշխանության պայմաններում» թեմայով հանրային քննարկման ժամանակ այսպիսի կարծիք հայտնեց ԲՀԿ անդամ Արման Աբովյանը։ Հանրային քննարկումը կազմակերպել են «Հանրային դաշինք» քաղաքացիական նախաձեռնությունը և «ՀայաՔվե» ազգային-քաղաքացիական միավորումը։
Արման Աբովյանը վստահեցրեց՝ ԲՀԿ-ին վստահած ամեն մարդու իրավունքի համար մինչև վերջ պայքարելու են։
Նա հիշեցրեց՝ ԲՀԿ-ից «լկտիաբար գողացան ձայները»․ «ԲՀԿ հետ կատարվածը ակնհայտ ցույց տվեց, որ իշխանությունը, որը հիմնվել էր 2018-2026-ը, որն ասում էր՝ ունի լեգիտիմություն, հունիսի 8-ի գիշերը բոլորս ականատես եղանք ուղղակի խուժանաբար Ընտրական օրենսգրքի, մարդու իրավունքների, ձայնի իրավունքի ոչնչացման, բռնաբարման։ 60 հազար ձայնը միայն ԲՀԿ-ի ձայնը չէ, այլև բոլոր այն մարդկանց, որոնք աչքով աչք չունեն ԲՀԿ-ի հետ»։
Արման Աբովյանը ցավով նշեց՝ այս պահին չի տեսնում հնարավորություն նույնիսկ ՍԴ դիմելու․ «Մենք հասկանում ենք, որ այս գործընթացներն այսօր անհնար են։ Ինչ-որ մեկը կա՞, որ կասկածում է, որ եթե ՍԴ-ին sms գա, որ նա որոշի՝ ՀՀ-ն գտնվում է Անտարկտիդայում և պիտի շարժվի համապատասխան Անտարկտիդայի օրենքների, դա չի անի»։
Կարդացեք նաև
Ըստ նրա՝ այս քաղաքացիական հարթակում ձևավորվում է այն ապագայի տեսլականը՝ իրավական առումով, որը պետք է ապահովի, որ հանկարծ չկրկնվի իր բնորոշմամբ՝ այն քաղաքագիտական, իրավական առումով խուժանությունը, որի պայմաններում այսօր ապրում ենք։
«Ընտրական իրավունքի սահմանափակումները՝ միահեծան իշխանության պայմաններում» թեմայով հանրային քննարկումն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
