Հայաստանը կարող է դուրս գալ Հավաքական անվտանգության պայմանագրի կազմակերպությունից (ՀԱՊԿ), եթե անդամակցությունն այլևս անհրաժեշտ չէ Երևանին։ Ինչպես հայտնում է ՏԱՍՍ-ը, լրագրողներին հայտարարել է ՌԴ նախագահի մամուլի քարտուղար Դմիտրի Պեսկովը։
«Եթե Երևանն իր ազգային շահերից ելնելով այլևս կարիք չունի տարածաշրջանային անվտանգության ապահովման համար այդքան կարևոր կազմակերպությանն անդամակցելու, ապա նա ազատ է համապատասխան որոշում կայացնելու և դուրս գալու այդ կազմակերպությունից», – ասել է Պեսկովը:
«Մինչ այժմ մենք տարբեր մակարդակներում լսել ենք հայկական կողմի ներկայացուցիչների հայտարարությունները, որոնք ասում էին, որ այո, անդամակցությունը սառեցված է, սակայն առայժմ Հայաստանը դուրս գալ չի նախատեսում։ Առնվազն մինչ այժմ մենք նման հայտարարություններ ենք լսել», — եզրափակել է Կրեմլի ներկայացուցիչը։
Ինչ վերաբերում է ԵՄ-ին անդամակցելու հայտին, URA.news-ի փոխանցմամբ՝ Պեսկովը հիշեցրել է, որ Թուրքիայի և այլ երկրների փորձը ցույց է տալիս, որ հայտի ներկայացման պահից կարող են տասնամյակներ անցնել։
Կարդացեք նաև
Պեսկովի խոսքով՝ հայտը ներկայացնելուց հետո Հայաստանը ստիպված կլինի իր օրենսդրությունը համապատասխանեցնել ԵՄ նորմերին, որոնք չեն համընկնում ԵԱՏՄ կանոնների հետ։ Ըստ նրա՝ դա հակասություններ կառաջացնի, որոնք առաջին հերթին կվնասեն հենց Հայաստանին։
