Sputnik Արմենիայի մուլտիմեդիոն մամուլի կենտրոնում կայացած ասուլիսում տնտեսագետ, Tvyal.com վերլուծական կայքի ղեկավար Աղասի Թավադյանը փաստեց, որ Հայաստանում արձանագրված 6,7% տնտեսական աճը հիմնականում պայմանավորված է արտաքին աղբյուրներով և ֆինանսական համակարգի ակտիվությամբ, մինչդեռ ռազմավարական կարևորություն ունեցող գյուղատնտեսության ոլորտը 15,5 %-ով անկում է ապրել: Տնտեսագետը պատմական է որակում այս անկումը: Նրա խոսքով, գյուղատնտեսությունը անցյալ տարվա նույն շրջանի համեմատ կրճատվել է 1/6-ով:
«Գյուղատնտեսությունը պարզապես 1/6-ով բռնվել ու ջնջվել է: Սրա նախանշաններն արդեն իսկ կային մինչև Ռուսաստանի կողմից կիրառված սահմանափակումները, որովհետեւ 2008-2015 թթ. գյուղատնտեսությունը կուտակային 13%-ով անկում էր ապրել, սակայն Ռուսաստանի կողմից կիրառված սահմանափակումները էլ ավելի արագացրին բացասական միտումները՝ լուրջ խնդիրներ ստեղծելով հայկական մրգերի արտահանման համար»,-ասաց տնտեսագետը:
Նրա խոսքով, տնտեսության 20 ճյուղերի մեջ, որոնցից բաղկացած է ՀՆԱ-ն, առաջին տեղում աճի առումով ֆինանսական համակարգն է, հետո՝ շինարարությունը, անշարժ գույքի շուկան, տեղեկատվություն և կապը, ինչպես նաև հանքարդյունաբերությունը:
Աղասի Թավադյանը նշում է, որ եթե ներկայիս վիճակը չլիներ, և գյուղատնտեսությունն անգամ զրոյական աճ արձանագրեր, ապա տնտեսական աճը գրանցվելու էր ոչ թե 6,7%, այլ գրեթե 8%, և հակառակը՝ եթե ֆինանսական համակարգն այս պահին այսքան մեծ աճ չարձանագրեր՝ դրսից եկող գումարներով, մենք կունենայինք ոչ թե 6,7% աճ, այլ 4,5:
Կարդացեք նաև
Գոհար ՀԱԿՈԲՅԱՆ
Լուսանկարը՝ Sputnik Արմենիայի
