Հայաստանում որոշ հայտարարություններն այն մասին, թե իբր Ռուսաստանը պատժամիջոցներ է սահմանել հայկական գյուղատնտեսական արտադրանքի որոշ տեսակների՝ ռուսական շուկա մատակարարումների նկատմամբ, մանիպուլյացիա են։ Այս մասին «ՌԻԱ Նովոստի»-ին տված հարցազրույցում հայտարարել է ՌԴ արտաքին գործերի նախարարի տեղակալ Միխայիլ Գալուզինը։
Գալուզինը ուշադրություն է հրավիրել այն հանգամանքի վրա, որ Հայաստանի մի շարք պաշտոնյաներ և տեղեկատվական ռեսուրսներ հայկական գյուղատնտեսական արտադրանքի որոշ տեսակների՝ ռուսական շուկա մատակարարումների նկատմամբ սահմանափակումները ներկայացնում են որպես Մոսկվայի կողմից սահմանված «պատժամիջոցներ»։
«Դրանք մանիպուլյացիաներ են, որոնք իրականության հետ որևէ կապ չունեն», – ասել է ՌԴ փոխնախարարը։
Նա ընդգծել է, որ ռուսական կողմը միշտ առանձնահատուկ ուշադրություն է դարձրել սանիտարական վերահսկողությանը, և իր պահանջները վաղուց հայտնի են․ հայկական արտադրողները պետք է օգտագործեն սեփական հումքը, իրականացվի թունաքիմիկատների նկատմամբ վերահսկողություն, ինչպես նաև ապահովվի մատակարարումների հետագծելիությունը։
Կարդացեք նաև
«Ավելին, Հայաստանի ղեկավարությունն ինքն է ընդունել, որ որոշակի արտադրատեսակների որակի հետ կապված խնդիրներ կան», – ընդգծել է Գալուզինը։
