Երևանի քաղաքապետարանի գործակարգավարական խորհրդակցության ժամանակ Երևանի քաղաքապետ Տիգրան Ավինյանը ներկայացրեց նոր նշանակումները. «Երևանի աղբահանություն և սանիտարական մաքրում» համայնքային հիմնարկի տնօրեն է նշանակվել Ռոմանոս Սաֆարյանը, իսկ ՔՊ-ական նախկին պատգամավոր Ջուլիետա Ազարյանը նշանակվել է քաղաքապետի մամուլի քարտուղար։
Ի թիվս այլնի՝ անդրադառնալով աղբահանության խնդիրներին՝ Տիգրան Ավինյանն ասաց, որ պետք է ավելացնել վարձակալական հիմունքներով տրամադրված աղբամանների քանակը, որովհետև, նրա խոսքով, մասնավոր բիզնեսներն իրենց ծավալներով գերծանրաբեռնում են աղբատարները։ «Ես կարծում եմ, որ վարձակալական հիմունքներով տրված աղբամանները Երևան քաղաքում շատ քիչ են»,-ասաց նա՝ ընդգծելով, որ տնտեսվարողները պետք է առանձնացված սպասարկում ստանան։
Կարդացեք նաև
Երևանի երթևեկությանն էլ անդրադարձ եղավ։ Ավինյանն արձանագրեց այն խնդիրները, որոնք քաղաքապետարանի համար գերակա են. «Դրանք ընդհանուր առմամբ երթևեկության կազմակերպման խնդիրներն են, գնալով աճող մարդատար մեքենաների քանակն է, տարատեսակ հատվածներում ապօրինի կանգառներն են…Պետք է հասկանալ, թե ավտոմեքենաները կանգառներից ոնց ենք հանում, որպեսզի հանրային տրանսպորտը երկրորդ գծում չկանգնի»։
Գործակարգավարական խորհրդակցությունն ամբողջությամբ
Գոհար ՀԱԿՈԲՅԱՆ
