ՀՔԱՎ-ը միացել է ավելի քան 60 երկրների 120-ից ավելի ՀԿ-ների, իրավաբան փորձագետների, մարդու իրավունքների պաշտպանների և Եվրոպական խորհրդարանի անդամների հրատապ կոչին՝ ուղղված Միջազգային քրեական դատարանի (ՄՔԴ) Անդամ պետություններին՝ պաշտպանելու Դատարանը և նրանց, ովքեր համագործակցում են Դատարանի հետ։ Միայն դատապարտումները բավարար չեն. հրատապ կերպով անհրաժեշտ է համակարգված գործողություն՝ Դատարանի գործելու կարողությունը պաշտպանելու համար:
Խիստ կերպով դատապարտում ենք Միջազգային քրեական դատարանի (ՄՔԴ) դեմ անօրինական պատժամիջոցներ սահմանելու Միացյալ Նահանգների (ԱՄՆ) որոշումը։ Այս աննախադեպ միջոցառումը ուղղակի հարված է իրավունքի գերակայությանը, Դատարանի և միջազգային արդարադատության անկախությանը, ինչը վերջնականապես խաթարում է ամբողջ աշխարհում զանգվածային վայրագությունների զոհերի և փրկվածների իրավունքները:
Ավելի քան տասնյակ իրավիճակային երկրներում, որոնք գտնվում են Դատարանի քննության ներքո ամբողջ աշխարհում, զոհերի, փրկվածների և վկաների համար հետևանքները կարող են խորը լինել: Շատերը տարիներ շարունակ սպասել են արդարադատության, վերապրել տրավմատիկ փորձառություններ և իրենց վստահությունը դրել ՄՔԴ-ի՝ որպես արդարադատության վերջին հույսի վրա: Դատարանի մանդատի կամ գործունեության ցանկացած խաթարում վտանգում է նրանց՝ արդարադատության իրավունքը։ Այն վտանգում է հաշվետվողականության և արդարադատության ջանքերի տասնամյակների ընթացքում ձեռք բերված նվաճումները՝ թողնելով պատերազմական հանցագործությունների, մարդկության դեմ հանցագործությունների և ցեղասպանության զոհերին առանց հաշվետվողականության, ճշմարտության և փոխհատուցման իմաստալից հեռանկարի:
Մտահոգության և դատապարտման հայտարարություններն այլևս բավարար արձագանք չեն այս հարձակմանը: Համակարգված արձագանքն այլևս չի կարող հետաձգվել: Երեք տասնամյակ առաջ պետությունները խոստացան, որ ոչ ոք, անկախ նրանից, թե որքան հզոր է, չի պաշտպանվելու միջազգային հանցագործությունների համար պատասխանատվությունից: Զոհերը և վկաները հույսը դրել էին ուժից կամ ազգությունից անկախ արդարադատություն իրականացնելու ընդունակ Դատարանի վրա, և այսօր ՄՔԴ-ն բախվում է աննախադեպ ճնշման հենց այն պատճառով, որ ձգտում է օրենքը հավասարապես կիրառել: ՄՔԴ Անդամ պետությունները հիմնել են Դատարանը և եզակի կերպով պատասխանատու են դրա անկախությունն ու արդյունավետությունը երաշխավորելու համար։ Վճռականորեն չարձագանքելը վտանգում է թուլացնել միջազգային արդարադատության համակարգը, որը պետությունները պարտավորվել էին պաշտպանել:
Կարդացեք նաև
Հիշեցնենք, որ ՀՀ-ն միացել է ՄՔԴ-ին, և կարևոր հիմնավորումներից մեկը հանդիսանում էր Ադրբեջանի կողմից ԼՂ-ից բռնի էթնիկ զտման, պատերազմական հանցագործությունների համար պատասխանատվության կիրառման ապահովումը։
Հայտարարությունն ամբողջությամբ՝այստեղ:
