Մոտավոր հաշվարկներով՝ Ֆրանսիայի ամբողջ տարածքում տեղի ունեցած բողոքի ցույցերին մասնակցել է շուրջ 550 հազար մարդ՝ պահանջելով ավելացնել ներդրումները կրթության ոլորտում և միջոցներ ձեռնարկել կյանքի թանկացման դեմ պայքարելու համար, հաղորդում է BBC-ն։
Ցույցերն արագ վերածվել են բռնության․ ցուցարարները հրկիզել են ավտոմեքենաներ և շենքեր, թալանել խանութներ։
Մայրաքաղաքում և երկրի այլ շրջաններում շենքեր են հրկիզվել, այդ թվում՝ Լիմոժում, որտեղ քաղաքապետարանի շենքում բռնկված խոշոր հրդեհի հետևանքով տանիքի մի մասը փլուզվել է։
Կարդացեք նաև
Մի քանի քաղաքներում թալան է սկսվել։ Հաղորդումներ են ստացվել նաև քաղաքային վարչական շենքերի և ձեռնարկությունների դեմ ուղղված լայնածավալ վանդալիզմի դեպքերի մասին։
Ֆրանսիայի վարչապետ Սեբաստիան Լըկորնյուն հայտարարել է, որ անկարգությունների ընթացքում տուժել է 150 ոստիկան։
Շաբաթ օրը ձերբակալվել է առնվազն 1200 մարդ։ Ոստիկանությունը, անկարգությունները ճնշելու նպատակով, արցունքաբեր գազ և ջրցան մեքենաներ է կիրառել՝ ամբոխը ցրելու համար։
Անկարգություններին նախորդել էին ուսանողների մի քանի շաբաթ շարունակվող բողոքի ցույցերը, որոնց ընթացքում ցուցարարները միավորել էին ուժերը՝ արտահայտելով իրենց աճող դժգոհությունը տնտեսական իրավիճակից և ճգնաժամի պայմաններում Ֆրանսիայի նախագահ Էմանուել Մակրոնի գործողություններից։
Սոցիալական ցանցերում հրապարակած հաղորդագրությամբ Մակրոնը դատապարտել է բռնությունը՝ հայտարարելով, որ վանդալիզմով զբաղվողներն ու թալանողները «պատասխանատվության կենթարկվեն և կպատժվեն»։
