«Քաղաքական հայացքներս չեն փոխվել, ամեն ինչ մնում է նույնը։ Պարզապես համարում եմ, որ օրենքը պետք է բոլորի համար հավասար լինի։ Իմ գրածը իշխանությունների քննադատություն չէ, պարզապես խնդիր կա, որը բարձրաձայնում եմ, և ուզում եմ, որ այն վերանայվի»,- Aravot.am-ին ասաց Մհեր Արմենիան՝ անդրադառնալով օրեր առաջ Facebook-ում կատարած իր գրառմանը։
Դրանում նա նշել էր, որ իշխանության ներկայացուցիչների հասցեին քննադատություն հնչեցրած քաղաքացիների նկատմամբ անմիջապես քրեական գործեր են հարուցվում, մինչդեռ եթե իշխանության ներկայացուցիչ չես, այլ, օրինակ, հանրային գործիչ, և Facebook-ում քեզ վիրավորում են, դատախազությունը հիմքեր չի գտնում վիրավորողի նկատմամբ քրեական գործ հարուցելու համար։
«Չեմ քննադատում իշխանություններին, ընդամենը ուզում եմ, որ օրենքը բոլորի համար հավասար լինի։ Վիրավորանքի, սպառնալիքի և նման դրսևորումների համար բոլորը պետք է կանգնեն օրենքի առաջ՝ անկախ նրանից, թե հասցեատերն ինչ քաղաքական հայացքներ ունի»,- կրկնեց Մհեր Արմենիան։
Կարդացեք նաև
Մեր հարցին՝ ինչո՞վ է պայմանավորում այն կողմնակալ վերաբերմունքը, որի հետևանքով միայն իշխանության ներկայացուցիչների հասցեին քննադատություն հնչեցնողների նկատմամբ է արագ վարույթ նախաձեռնվում, Մհեր Արմենիան պատասխանեց. «Չեմ կարող ասել։ Գրառմանս դեռ միայն լրատվամիջոցներն են արձագանքել։ Կարծում եմ՝ հանդիպումներ կլինեն իշխանության ներկայացուցիչների հետ, այս հարցը նրանց մոտ էլ կբարձրաձայնեմ»։
Մեր հարցին, թե նախկինում քննադատում էր իշխանություններին, այնուհետև սկսեց գովերգել նրանց, իսկ այժմ կրկին դժգոհություն է հայտնում իշխանության ներկայացուցիչների հասցեին քննադատության դեպքերով քրեական գործեր հարուցելու վերաբերյալ, չի՞ կարծում, որ իր դիրքորոշումների նման փոփոխականությունը կարող է միանշանակ չընկալվել իր լսարանի կողմից, Մհեր Արմենիան պատասխանեց. «Ինչպես մարդիկ ուզում են, այդպես էլ ընկալում են։ Խնդիր եմ տեսել, բարձրաձայնում եմ»։
Արփինե ՍԻՄՈՆՅԱՆ
