Հայաստանը շարունակում է իր ներկայացվածությունը եվրոպական բարձրագույն կրթության որակի ապահովման ոլորտի առանցքային կառույցներից մեկի ղեկավար մարմնում։
Հոկտեմբերի 22-ին Իսպանիայի Լաս Պալմաս դե Գրան Կանարիա քաղաքում կայացած Եվրոպական բարձրագույն կրթության որակի ապահովման ասոցիացիայի (ENQA) գլխավոր ասամբլեայի ընթացքում Մասնագիտական կրթության որակի ապահովման ազգային կենտրոնի (ՈԱԱԿ) Ինստիտուցիոնալ և ծրագրային փորձաքննության բաժնի ղեկավար Վարդուհի Գյուլազյանն ընտրվել է ENQA-ի կառավարման խորհրդի անդամ՝ երեք տարի ժամկետով։
Ընտրությունը տեղի է ունեցել ENQA-ի անդամ կազմակերպությունների ներկայացուցիչների քվեարկության արդյունքում։
Այս ընտրությունը կարևոր ձեռքբերում է Հայաստանի բարձրագույն կրթության որակի ապահովման համակարգի համար և միջազգային մասնագիտական հանրության վստահության արտահայտություն՝ հայ մասնագետների փորձի, կարողությունների և մասնագիտական ներուժի նկատմամբ։
Կարդացեք նաև
ENQA-ի կառավարման խորհուրդն առանցքային դեր ունի ասոցիացիայի ռազմավարական ուղղությունների սահմանման, գործունեության առաջնահերթությունների ձևավորման և դրանց իրականացման վերահսկման գործում։ Հայաստանի ներկայացուցչի ընտրությունը հնարավորություն է ընձեռում անմիջականորեն մասնակցելու եվրոպական բարձրագույն կրթության որակի ապահովման քաղաքականության և ռազմավարական որոշումների մշակման ու ընդունման գործընթացներին։
ENQA-ն եվրոպական բարձրագույն կրթության որակի ապահովման համակարգի առաջատար մասնագիտական կառույցներից է։ Ասոցիացիան կարևոր դերակատարություն ունի Եվրոպական բարձրագույն կրթության տարածքում որակի ապահովման քաղաքականության զարգացման, Որակի ապահովման եվրոպական չափանիշների և ուղենիշների (ESG) կիրառման խթանման, ինչպես նաև որակի արտաքին ապահովման համակարգերի կատարելագործման գործում։
Հայաստանի ներկայացվածությունը ENQA-ի կառավարման խորհրդում սկսվել է 2019 թվականին՝ ՈԱԱԿ-ի տնօրեն Ռուբեն Թոփչյանի ընտրությամբ, որը 2022 թվականին վերընտրվել է երկրորդ անգամ։ Վարդուհի Գյուլազյանի ընտրությունը շարունակում է Հայաստանի մասնակցությունն ասոցիացիայի կառավարման գործընթացներին։
ՈԱԱԿ-ը 2017 թվականից ENQA-ի լիիրավ անդամ է և ակտիվորեն ներգրավված է եվրոպական բարձրագույն կրթության որակի ապահովման նախաձեռնություններում։ Կառավարման խորհրդում Հայաստանի ներկայացվածությունը նոր հնարավորություններ է ստեղծում միջազգային համագործակցության խորացման, հայկական փորձի ներկայացման և եվրոպական որակի ապահովման քաղաքականության զարգացման գործում Հայաստանի ներդրման ընդլայնման համար։
Գլխավոր ասամբլեայի ընթացքում ENQA-ի նախագահ է ընտրվել Հունգարիայի հավատարմագրման կոմիտեի (MAB) գլխավոր տնօրեն Պետեր Լևենտե Լակատոշը, իսկ կառավարման խորհրդի նոր անդամ՝ նաև Գերմանիայի AQAS որակի ապահովման գործակալության ներկայացուցիչ Ռոննի Հայնցեն։
Մասնագիտական կրթության որակի ապահովման ազգային կենտրոն
