Ներքին գործերի նախարար Արփինե Սարգսյանն այսօր խորհրդարանում լրագրողների հետ ճեպազրույցում անդրադարձավ հանցավորության աճին, զենքի շրջանառությանը և կադրային փոփոխություններին։
Հարցին, թե պաշտոնանկությունները լուծո՞ւմ են հանցավորության դեմ պայքարի արդյունավետության հարցերը, նախարարը պատասխանեց․ «Այնպես չէ, որ մենք տարբեր իրավիճակներում գնում ենք պաշտոնանկության, դրա համար պետք է լինեն հիմքեր։ Էրեբունիի դեպքի մասով ես ինքս տեսել եմ հիմք, եւ Էրեբունու բաժնի պետն ու բաժնի պետի տեղակալն ազատվել են զբաղեցրած պաշտոնից։ Բայց այնպես չէ, որ միշտ լուծումը լինում է պաշտոնանկությունը, բայց վստահաբար կան իրավիճակներ, երբ դա ուղղակի անհրաժեշտ է։ Եթե աշխատաոճի փոփոխություն չես նկատում, այստեղ ուղղակի պիտի գնաս կադրային փոփոխության, որովհետև այլ տարբերակ չկա»։
Միաժամանակ Արփինե Սարգսյանն ասաց, որ կադրային խնդիրներ ունեն, որովհետև այնպես չէ, որ ունեն կադրային պատրաստի այնպիսի բազա, որը միանգամից կարող է հավակնել ղեկավար պաշտոնի։ Բայց աշխատանք է տարվում այդ հարցը լուծելու ուղղությամբ։
Մանրամասները՝ տեսանյութում
Կարդացեք նաև
«Ինչ վերաբերում է կրակոցների թվին և բովանդակությանը, դուք շատ լավ գիտեք, որ երբ խոսում եք կրակոցների մասին, դա կարող է լինել մարտական զենքից, ինչը վերջին ժամանակներում շատ ավելի սակավ է, կարող է լինել օդաճնշիչ ատրճանակով և այսպես շարունակ։ Ինչ վերաբերում է զենքի ազատ շրջանառությանը, այո, ես խնդիր տեսնում եմ դրա մեջ, և առաջիկայում զենքի շրջանառության կարգավորման մասին օրենքում փոփոխություններ ենք նախաձեռնելու»,- հավելեց Արփինե Սարգսյանը։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
