Այսօր Եղիշե Չարենցի տուն- թանգարանում բացվեց Հայաստանի ժողովրդական նկարիչ Միքայել Արուտչյանի անհատական ցուցահանդեսը: Ինչպես լրագրողներին տեղեկացրեց թանգարանի տնօրեն Լիլիթ Հակոբյանը, ցուցահանդեսը
նվիրված է արվեստագետի ծննդյան 115 և Շուշիի ազատագրման 20-րդ տարեդարձին. «Ցուցադրված են ինչպես թանգարանի ունեցած, այնպես էլ Արուտչյանի անձնական հավաքածուից նմուշներ՝ գրաֆիկական գործեր, «Երկիր Նաիրի» վեպի եւ «Եվգենի Օնեգինի» ձեւավորումները, կա նաեւ կանացի կերպարների հրաշալի շարք: Որոշ գործեր առաջին անգամ են ցուցադրվում»:
Բացման խոսքում Ազգային պատկերասրահի տնօրեն Փարավոն Միրզոյանն առանձնացրեց 20-30-ական թթ. երկու մեծ վարպետներ համարվող Չարենցին եւ Արուտչյանին՝ նշելով նրանց դերը ժամանակի մշակութային կյանքի, հատկապես հայ գրքի եւ թատերական ներկայացումների ձեւավորման գործում. «Դա պատմական ժամանակաշրջան էր, եւ մենք պետք է ուրախ լինենք, որ Արուտչյանի նման նկարիչը Մոսկվայում մեծ գնահատականի է արժանացել»:
Կարդացեք նաև
Aravot.am-ի հետ զրույցում Արուտչյանի ընկեր, Հայաստանի ժողովրդական նկարիչ Ստեփան Անդրանիկյանը նշեց, որ Արուտչյանն այն նկարիչներից էր, որը մեծ հետք թողեց հատկապես 1920-30 -ական թվականների արվեստի վրա. «Նա հետաքրքիր էր եւ տաղանդավոր, չնայած այն հանգամանքին, որ Մոսկվայում էր բնակվում: Նրան շնորհվեց Հայաստանի պատվավոր նկարչի կոչում, բայց պետք է ասել, որ Հայաստանում նա արժանի կերպով չի գնահատվել, նրա մասին նույնիսկ մոնոգրաֆիա չկա տպագրված»:
Անդրանիկյանը նշեց, որ բախտ է ունեցել Արուտչյանի հետ աշխատել «Հյուսիսային ծիածան» ֆիլմում. «Ժամանակ եղավ, որ նա հիվանդ էր եւ չկարողացավ մասնակցել նկարահանումներին, եւ ես փոխարինեցի նրան, որ չզգացվի իր պակասը: Նա զգեստների նկարիչ էր, մարդամոտ եւ հյուրընկալ անձնավորություն»:
Նշենք, որ Արուտչյանը ներկայացումներ է ձևավորել նաև Երևանի, Բաքվի, Թբիլիսիի թատրոններում, եղել է «Խասփուշ», «Զամալլու», «Պեպո», «Դավիթ- Բեկ», «Հյուսիսային ծիածան» ֆիլմերի բեմադրող նկարիչը, պատկերազարդել ինչպես հայ, այնպես էլ ռուս հեղինակների գրքեր: «Շատ նկարիչների, ինչպես եւ Արուտչյանին, մարդիկ պարզապես չեն հիշում: Դա մեր ազգի վատ կողմն է, մենք չենք կարողանում ըստ արժանվույնս գնահատել մեր նկարիչներին»,-ասում է Ս. Անդրանիկյանը:
Լուիզա ՍՈՒՔԻԱՍՅԱՆ
