Այսօր ՀԱԿ խմբակցության ղեկավար Լեւոն Զուրաբյանը դատախազության առջեւ ի պաշտպանություն ՀԱԿ ակտիվիստների կազմակերպված բողոքի ակցիային անդրադարձավ Քրեական վերաքննիչ դատարանի դատավոր Եվա Դարբինյանի որոշմանը: Հիշեցնենք, որ երկու օր առաջ դատավորը դարձյալ մերժեց ՀԱԿ ակտիվիստների պաշտպան Մուշեղ Շուշանյանի հերթական միջնորդությունը՝ Տիգրան Առաքելյանի խափանման միջոցը փոխելու եւ նրան ազատ արձակելու, որի տակ ստորագրել էին 110 հայտնի անձինք:
Լեւոն Զուրաբյանի խոսքերով՝ «Բոլորին պարզ է, որ խնդիրն իրավական հարթության մեջ դրված չէ, սա բռնապետության կամայականությունն է: Բոլորին հասկանալի է դառնում, որ մենք գործ ունենք դասական քաղբանտարկյալի հետ: Եթե առաջ դա մենք էինք ասում, հիմա ամբողջ հասարակությունն է դա պնդում: Դա, ըստ էության, ապտակ է մեր հասարակությանը, բոլոր այն մարդկանց, ովքեր ստորագրել են անձնական երաշխավորությունը, աջակցել են այդ նախաձեռնությանը: Նման ապտակ մենք կարո՞ղ ենք մարսել: Մեր հասարակությունը նման ապտակ չի ընդունի, չի մարսի եւ կպայքարի մինչեւ վերջ՝ ավելի ոգեւորված: Քանի որ վիրավորվածը հասարակությունն է, հասարակությունն էլ հենց գտնելու է ադեկվատ պատասխան:
Ես առաջարկում եմ Հայաստանում ստեղծել Տիգրան Առաքելյանի պաշտպանության կոմիտե՝ մասսայական մի կազմակերպություն: Ցանկացած մարդ ընդամենը ստորագրելու է հետեւյալ նախադասության տակ՝ «Մենք ճանաչում ենք Տիգրան Առաքելյանին քաղբանտարկյալ եւ պահանջում ենք անհապաղ ազատել նրան»: Պետք է դրա տակ ստորագրել եւ դառնալ կոմիտեի անդամ: Սա ՀՀ-ում լինելու է ամենամասսայական կազմակերպությունը»:
Լեւոն Զուրաբյանը համաձայնություն է ձեռք բերել մի շարք թերթերի խմբագիրների հետ, որոնք վաղվանից սկսած խոստացել են առաջին էջում զետեղել Տիգրան Առաքելյանին քաղբանտարկյալ ճանաչելու այդ նախադասությունը: Այս պահին 6 թերթեր են («Չորրորդ ինքնիշխանություն», «Առավոտ», «Ժողովուրդ», «Հրապարակ», «168 ժամ», «Ժամանակ») համաձայնել հրապարակել այդ նախադասությունը:
Կարդացեք նաև
Հռիփսիմե ՋԵԲԵՋՅԱՆ
