Այսօր «Եվրոպական ժառանգության օրերի» շրջանակներում Երեւանի մետրոպոլիտենի 5 կայարանում բացվեց «ԵՐԵՎԱՆ. Հայացք XXI-րդ դարից» լուսանկարչական ցուցահանդեսը: Ներկայացված է 180 նկար` 19-րդ դարի վերջի եւ 20-րդ դարի առաջին կեսի Երեւանը: Ցուցահանդեսը կազմակերպվել էր ՀՀ մշակույթի նախարարության եւ Երեւանի պատմության թանգարանի համագործակցությամբ: Լուսանկարներում ներկայացված են երեւանյան փողոցներ, հասարակական, վարչական նշանակության եւ անձնական օգտագործման կառույցներ:
ՀՀ մշակույթի փոխնախարար Արեւ Սամուելյանի փոխանցմամբ` առանձնահատուկ տեղ է հատկացված թամանյանական Երեւանին. «Ամենակարեւորն այն է, որ մետրոյից օգտվողը ճանաչի մեր քաղաքի պատմությունը ու մշակույթը դառնա առօրյայի անբաժան մաս»,-ասաց փոխնախարարը` հավելելով, որ հին քաղաքը նոր աչքերով տեսնելուց զատ, գնահատենք եւ պահպանենք այն, ինչ այսօր ունենք:
Պատմության թանգարանի տնօրեն Արմինե Սարգսյանն էլ նշեց, որ թանգարանում պահպանվում է 14 հազարից ավելի լուսանկար, որտեղ պատկերված է Երեւանը 19-րդ դարի վերջերից մինչեւ մեր օրեր: «Ցուցահանդեսի հիմքում ընկած է «Պահպանենք մեր ժառանգությունը» գաղափարը եւ այդ ժառանգությունը ցուցադրելու եւ պահպանելու միտումը»,-ասաց նա: Ցուցահանդեսը բաց կլինի մինչեւ հոկտեմբերի 21-ը:
Կարդացեք նաև
Քրիստինա ՄԻՐԶՈՅԱՆ
