«Ոչ թե մթերող ընկերությունները պատրաստ չեն, այլ ալկոհոլոյին`գինի, կոնյակի արտահանման ծավալները կրճատվել են 70 տոկոսով»,-այսօր խորհրդարանում, Aravot.am-ի հարցին ի պատասխան, ասաց Ազգային ժողովի ՀՀԿ խմբակցության պատգամավոր, ՄԱՊ ընկերության սեփականատեր Ալեքսան Պետրոսյանը:
Նա հավելում է, որ բերքն այս տարի ընդհանրապես առատ է եղել եւ խնդիր է առաջանում հիմնականում բերքի ավելի մասով. «Ովքեր պայմանագիր ունեցել են, պայմանագրային խաղողները բոլորն էլ ընդունում ենք: Գյուղացիների մի մաս կա, չեն սիրում պայմանագիր կապես, ես ձեզ ասեմ: Նայում են, տեսնում են որտեղ որ ընդունենք շահավետ ա, էնտեղ ա ծախում»:
Հետաքրքրվեցինք`ինչո՞վ է պայմանավորված արտահանման ծավալների նման անկումը, քանի որ անցյալ տարի այս ժամանակահատվածում նաեւ Ալեքսան Պետրոսյանն էր պնդում, որ ԵԱՏՄ-ի շուկան արտադրողների եւ արտահանման առումով լայն հնարավորություններ է բացելու: Դիտարկումն այդքան էլ դուր չեկավ պատգամավորին, բայց նա պատասխանեց, որ ԵԱՏՄ-ին անդամագրվելը բոլորովին կապ չունի ռուսական ռուբլու անկման հետ. «Մենք դոլարով ենք ծախել Ռուսաստանում, ռուսական ռուբլին արժեզրկվել է հարյուր տոկոսից ավել, տեղյակ եք: Էդ պայմաններում մեր ապրանքները էդ շուկայում անմրցունակ են դառնում, որովհետեւ ապրանքը չի թանկացել»:
Նկատենք, սակայն, որ անցյալ տարի այս շրջանում, երբ բոլորը ջանում էին հիմնավորել ԵԱՏՄ-ին անդամակցությունն, արդեն իսկ ակնհայտ էր, որ Ռուսաստանի տնտեսությունը չի կարող հեռանկարներ խոստանալ:
Կարդացեք նաև
Պատգամավորն այն կարծիքին է, որ հայ գործարարները պետք է նորանոր շուկաներ փնտրեն`ՌԴ-ից եւ Եվրոպայից դուրս:
Զրույցի այլ մանրամասները`տեսանյութում
Նելլի ԳՐԻԳՈՐՅԱՆ
