Ռուսական ռազմաբազայի ջոկի հրամանատարի գլուխն են ջարդել. նոր մանրամասներ՝ ռուս ծառայակիցների ծեծկռտուքից

Ռուսական ռազմաբազայի ջոկի հրամանատարի գլուխն են ջարդել. նոր մանրամասներ՝ ռուս ծառայակիցների ծեծկռտուքից

Երեկ Գյումրու «Մուշ» թաղամասում՝ Հալաբյան փողոց թիվ 3 շենքի բակում ծեծկռտուք էր տեղի ունեցել Գյումրիում տեղակայված ռուսական 102-րդ ռազմաբազայի ծառայակիցներ՝ ջոկի հրամանատարներ 23-ամյա Վլադիսլավ Կռասովսկիի, 22-ամյա Վիկտոր Յուդինի, 26-ամյա Նուրսուլթան Գիզատուլաևի և 26-ամյա Յուրի Նիկոլաևի միջև:

Ոստիկանությունից Aravot.am-ին փոխանցեցին, որ ծեծկռտուքը նկատել ու կանխել են տեղում հսկողություն իրականացնող ոստիկանները՝ «Մուշ» բաժնի պարեկապահակային դասակի ծառայողները: Ոստիկանների մոտենալու ժամանակ 3-ը դիմել են փախուստի, մեկին՝ 26-ամյա Յուրի Նիկոլաևին հայտնաբերել են գետնին ընկած: Ըստ տեղեկությունների, վերջիններս եղել են հարբած վիճակում:

Յուրի Նիկոլաևին տեղափոխել են Գյումրի բժշկական կենտրոն՝ մարմնական վնասվածքներով: Ի դեպ, հիվանդանոցից ևս փաստեցին, որ նա եղել է խմած: Ինչպես Aravot.am-ին տեղեկացրեց Գյումրի բժշկական կենտրոնի փոխտնօրեն Արմեն Խաչատրյանը, վերջինիս հիվանդանոց են տեղափոխել փակ գանգուղեղային վնասվածքով, մաղոսկրի կոտրվածքով (գանգի հիմ, առաջնային գանգափոս), գլխուղեղի սալջարդով, թեթև աստիճանի աջ վերին կոպի սալջարդով, արյան զեղումով:

Դեպքի մասնակից ջոկի հրամանատարները ոստիկանությունում բացատրություն են տվել: Ըստ Aravot.am-ի տեղեկությունների, Գյումրու «Մուշ» թաղամասի շենքերից մեկում ռազմաբազայի ջոկի հրամանատարները նստել, միասին կերուխումի են մասնակցել, հետո որոշել են շարունակել կերուխումը մեկ այլ վայրում: Դուրս գալով շենքի բակ՝ սկսել են տարբերակներ քննարկել՝ ուր գնալ, ամեն մեկը մի տեղ է ուզել, վերջիններիս միջև անհամաձայնություն է սկսվել, որն էլ վերածվել է ծեծկռտուքի: Նրանից մեկը՝ Գիզատուալևը խփել է Յուրի Նիկոլաևին: Նրան գետնի վրա հայտնաբերած ոստիկանները տեսել են, որ արյունահոսում է, շտապօգնություն են կանչել՝ նրան տեղափոխել Գյումրի բժշկական կենտրոն:

Ի դեպ, Նուրսուլթան Գիզատուալևը իր ցուցմունքում նշել է, որ ընդամենը խփել է Յուրի Նիկոլաևի աչքին, մինչդեռ, ըստ բժիշկների, գլխի լուրջ վնասվածքներ է ստացել:

Ընթանում է հետաքննություն՝ պարզելու, թե մարմնական վնասվածքներ ստացած զինծառայողը վա՞յր է ընկել, թե՞ գլուխը ջարդվել է ծեծի ենթարկվելուց:

Նունե ԱՐԵՎՇԱՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք