Ավետիք Իսահակյանի անվան գրադարանում հոկտեմբերի 20-ին տեղի ունեցավ հանդիպում գրող, հասարակական գործիչ, կինոռեժիսոր Տիգրան Պասկևիչյանի հետ և նրա «Վերջին երազանքը կամ Game over» ֆիլմի դիտումը:
Տիգրան Պասկևիչյանը մինչ ֆիլմի դիտումը ներկայացրեց ստեղծման պատմությունը․ «Այն 1946-1949 թվականների հայրենադարձության պատմությունն է։ «Դարձ ի շրջանս յուր» նախագծի շրջանակներում ներկայացրել ենք երեք ֆիլմ: Առաջինը բուն գաղթի մասին է, երկրորդ մասը ներկայացնում է հայրենադարձածների կյանքը ստալինյան ժամանակաշրջանում և մեծ աքսորի տարիներին: Եվ վերջին երրորդ մասը պատմում է խրուշչովյան և հետագայում բրեժնևյան ժամանակաշրջանում արտագաղթի միտումների մասին»:
Գրողի խոսքերով, նախագծի շրջանակներում անցած տարի կազմակերպել են ցուցահանդեսներ և հրատարակել գիրք՝ հոդվածներից կազմված:
Կինոդիտումից հետո գրողը խոսեց ֆիլմի ստեղծման հետ կապված դժվարություններից. «Հիմնականում դժվարություններն էին՝ կարճ ժամանակը և փոքր ֆինանսավորումը, մարդկանց գտնելը, շփվելը բավականին հեշտ էր, քանի որ մեկը մյուսի մասին հուշում էր և ձնագնդիի նման միմյանց լրացնում»։
Իսկ վերնագրի ընտրության հետ կապված Տիգրան Պասկևիչյանը մեկնաբանեց, որ մարդկանց վերջին երազանքն էր գալ Հայաստանում ապրել։ Սակայն ճնշումները և հիասթափությունը ստիպեցին, որ երազանքը փոխվի և դառնա Հայաստանից գնալը։ Դրա համար էլ գրողը վերջում բառախաղի էր դիմել՝ «Game over» կամ game овир:
Կարինե ԿԻՐԱԿՈՍՅԱՆ
