Կողմնորոշվեք՝ սանձարձակի՞ են սանձել, թե՞ ավանդապահ հայ կնոջ. Ի՞նչ են գրում ավագանու ծեծկռտուքի մասին ֆեյսբուքյան օգտատերերը

Կողմնորոշվեք՝ սանձարձակի՞ են սանձել, թե՞ ավանդապահ հայ կնոջ. Ի՞նչ են գրում ավագանու ծեծկռտուքի մասին ֆեյսբուքյան օգտատերերը

Երեւանի քաղաքապետարանում երեկ տեղի ունեցած ծեծկռտուքը սոցցանցերում տարաբնույթ մեկնաբանությունների, քննարկումների առիթ է դարձել: Տարոն Մարգարյանի կողմնակիցները «Երկիր Ծիրանիի» անդամներին քննադատում են՝ «վայ քեզ կին ասողի» տրամաբանությամբ, իսկ մյուսները դատապարտում են կանանց նկատմամբ բռնությունն ու անթույլատրելի պահվածքը՝ ավագանիում: Ֆեյսբուքում պտտվում են Գոռ Վարդանյանի ֆիլմերը, մասնավորապես՝ «Հրեշների գայլը»: Հիշեցնենք, որ ծեծկռտուքի ժամանակ Գոռ Վարդանյանը կարատեական հնարքով «Երկիր Ծիրանիի» անդամ Մարինա Խաչատրյանին դուրս էր հանել սրահից ու շպրտել:

Միջադեպին անդրադարձել են ֆեյսբուքյան ակտիվ օգտատերերի մեծ մասը:

Կոնստանտին Տեր-Նակալյանը գրում է՝ «Կնոջ վրա ձեռք բարձրացնել չի կարելի: Վերջակետ: Անգամ ամենավերջին մարմնավաճառի դեպքում դա անթույլատրելի է: Ի դեպ, ես որքան նայեցի, չտեսա, որ Գոռ Վարդանյանը խփի, տեսա, որ հետևից գրկեց ու տեղափոխեց, տեսա, որ հրեց, բայց չի հարվածել ու առավել եւս` չի ծեծել: Խփողներ էլ կային, բայց Գոռը չէր: Հուսամ, այս ամենին կտրվի իրավական գնահատական»:

Ուշագրավ է, որ գրառումներն ուղեկցվում են սրամիտ հեշթեգերով: Կոնկրետ այս գրառման հեշթեգն է՝ «#ԾիրաններիԳայլը»

Մեդիափորձագետ Սամվել Մարտիրոսյանը Գոռ Վարդանյանի ավագանիում կիրառած «հնարքի» կադրերը տեղադրել է ու գրել՝ «Յաիսնիչա, նո ս պամիդորոմ վազվրաշյաետսյա»: Ոստիկանապետի նախկին խորհրդական Նարեկ Մալյանը Բրյուս Լիի կինոյից կադրեր էր դրել եւ գրառում արել. «Իրավիճակի դուալիզմը կայանում է նրանում, որ «ինչպե՞ս կարելի է կնոջը հրել» թեզը առաջ են քաշում հայրենի ֆեմինիստները #դուք_ֆեմինիստ_եք_թե_որսորդ
#լայքն_ու_շեյրը_խառնվել_է:

Դերասան Հովհաննես Ազոյանը գրել է՝ «Տարոն Մարգարյանը Նուբարաշենում ստացել է 85% ձայն , ի դեպպպպ… յուրաքանչյուր ժողովուրդ արժանի է իր իշխանությանը»: Նա նաեւ տարածել է կանանց ծեծող ՀՀԿ-ականների՝ մազ քաշողների նկարները եւ գրել՝ ճանաչե՛ք:

Ազոյանը ֆեյսբուքում նաեւ սարկազմով հետաքրքրվում է՝ բա ՀՀԿ «արվեստագետ» ավագանիները ի՞նչու չեն մասնակցում կին ծեծելու գործին: Ըստ նրա, «ՀՀԿ-ի ղեկավարությունը պետք է հեռացնի սրանց իրենց կուսակցությունից»:

Լրագրող Լեւոն Սարդարյանը գրում է՝ «Երբ Ալեքսանդր Մակեդոնացուն մարտահրավեր նետեցին ամազոնուհիները, Ալեքսանդրը հրաժարվեց ճակատամարտից: Հարցին, թե` ինչո՞ւ, Ալեքսանդր Մեծը պատասխանեց` եթե ես նրանց հաղթեի, ապա դրանից փառքս չէր ավելանա: Իսկ եթե պարտվեի, ապա կասեին` կանայք Ալեքսանդրին ծեծեցին:
Դրա համար էլ ինքը Ալեքսանդր ՄԵԾ ա, իսկ դուք` ուռո գլուխ»:

Ակտիվիստ Դավիթ Սանասարյանն էլ այսպիսի գրառում է արել՝ «Նայեցի ավագանու «նիստի» քուչի իրարանցումը, էն տաս գոռվարդանյանների պահվածքը ու էդ նողկալի վիճակներն իմ համար նորություն չի. նազիր-վեզիրները պետք է էդպես էլ պահեին իրենց, բա հո դրական պահվածքով չէին աչքի ընկնելու…Եթե դուք կարծում եք, որ ՀՀԿ-ականների նպատակն ապտակել, մազ քաշել կամ վիրավորելն էր, ապա դուք չգիտեք իշխանության ծառայամիտների հոգեբանությունը։ ՔԾՆԱՆՔ, այ սա է նպատակը, ուրիշ ոչինչ»:

Իսկ լրագրողների տարբեր գրառումների մեկնաբանություններում Տարոն Մարգարյանի թիմակիցների պահվածքը արդարացնում են Երեւանի քաղաքապետարանի աշխատակիցները:

«Երկիր Ծիրանիի» անդամ Մարինա Խաչատրյանն «Ազատության» եթերում հայտարարել էր, որ ՀՀԿ-ական Էդմոն Կիրակոսյանը սեռական բռնության է ենթարկել իրեն, կրծքերին եւ մարմնի այլ մասերին է ձեռք տվել, ինչին ի պատասխան էլ ապտակել է Կիրակոսյանին: Քաղաքապետի օգնական Մարիա Բարաղամյանն այս առնչությամբ մեկնաբանությանն արձագանքել է. «Լո՞ւրջ, էդ երբ հասցրեց էդքան գործողություն անել, իմ աչքի առջև էր: Ամեն ինչ տեսանյութում երևում ա: Նա ապտակում է Էդմոնին, ձգում է փողկապը, Էդմոնն էլ համարժեք պատասխան է տալիս: Մնացածը՝ իրավապահ մարմինները կմեկնաբանեն: Ես չեմ մեկնաբանում #ԵրկիրԾիրանիի#գարշահոտության օպերացիան, որն էլ ձախողվեց»:

«Արմքոմեդիի» Նարեկ Մարգարյանն էլ գրում է « Maria Baraghamyan Ապտակող կնոջը հարվածելը ե՞րբ դառավ համարժեք պատասխան։ Ես ինչ-որ էդ պահը բաց թողեցի»:

Քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանն էլ պահանջում է,որ տեսանյութերով ներկայացնեն տվյալ անձի մարմնի նշված մասերին «ձեռք տալու» «ապացույցները»:

Երբ օգտատերերը նշում են, որ մարդիկ իրենց ակցիան էին անում, ինչո՞ւ ծեծեցին՝ Արթուր Գեւորգյանը հակադարձում է՝ «փաստորեն որեւէ չափ ու սահման չճանաչող սանձարձակությունը կոչվում է ակցիա՞»: Գեւորգյանը հավելում է՝ «Անկախ ամեն ինչից, Երեւանի քաղաքապետարանը եղել ու միշտ էլ լինելու է Երեւանի բնակչի կողքին: Իսկ սանձարձակ ակցիաները միշտ էլ ընդամենը այսրոպեական էժանագին դիվիդենտներ շահելու նպատակ են հետապնդել, ինչն այս դեպքում, ուղղակի ձախողվեց»: Գեւորգյանի մեկնաբանությամբ՝ «Գուցե կողմնորոշվե՞ք ի վերջո, սանձարձակ ակցիա կատարողի՞ն են սանձել, թե՞ իրապես հայ, ավանդապահ կնոջը, ինչն, անշուշտ, որեւէ բանական մարդ, առավել եւս հայ տղամարդ, երբեք չի՛ արդարացնի»:

Ի դեպ, «Արմքոմեդին» շուտով պատրաստվում է անդրադառնալ «Բեթմեն Գոռ Վարդանյան vs Երկիր Ծիրանի» մենամարտին, ֆեյսբուքում արդեն պտտվում է անոնսը:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք