Հայաստանում Չինաստանի Ժողովրդական Հանրապետության արտակարգ եւ լիազոր դեսպան Չժու Չժաոշուն՝ ի տարբերություն այլ դեսպանների, որոնք դեռեւս լռում են, շատ խանդավառված է սպիդի բուժման նոր դեղամիջոցով։ Չինական կողմը, ավելին, գտնում է, որ դեղամիջոցի հեղինակներին պետք է ներկայացնել Նոբելյան մրցանակի։
– Պրն Չժաոշու, Չինաստանն աշխարհի ամենամարդաշատ երկիրն է։ Եթե դժվար չէ, ներկայացրեք, խնդրում եմ, մարդահամարի վերջին տվյալները։
– Ես շատ կոնկրետ թիվ չեմ կարող ասել, մոտավորապես մեկ միլիարդ 260 միլիոն մարդ։
– Սպիդով հիվանդների մոտավոր թիվը գիտե՞ք։
Կարդացեք նաև
– Ձեռքիս տակ ճշգրիտ փաստեր չկան, բայց վերջին 10 տարիների ընթացքում սպիդով հիվանդների թիվն արագորեն աճում է։ Սա մեր դարի սարսափելի հիվանդությունն է։
– Հետաքրքիր է, թե ո՞րն էր ձեր առաջին վերաբերմունքը, երբ լսեցիք Սերժ Սարգսյանի հայտարարությունն «Արմենիկումի» առիթով։
– Ես լիովին հավատում եմ։ Բազմիցս եմ ասել, որ հայ ժողովուրդը շատ ինտելեկտուալ է։ Այստեղ՝ Հայաստանում եղել են եւ կան շատ հայտնի գիտնականներ, քաղաքական եւ ռազմական գործիչներ։ Ես հավատում եմ, որ հենց հայ բժիշկներն են հայտնագործել այս դեղամիջոցը։
– Դուք պաշտոնական դիմում ուղարկե՞լ եք Պեկին։
– Ես արդեն ե՛ւ Չինաստանի արտգործնախարարություն, ե՛ւ առողջապահության նախարարություն եմ ուղարկել լուրը։
– Պատասխան ստացե՞լ եք։
– Դեռ՝ ոչ։ Բայց ես հավատում եմ այդ լուրի հավաստիությանը, որովհետեւ Սերժ Սարգսյանն իմ ընկերն է, ես նրան հարգում եմ, եւ նա երբեք սուտ չի խոսում։ Վերջերս ես հանդիպել եւ ծանոթացել եմ Հայաստանի առողջապահության նախարարի հետ։ Կարծում եմ, որ սա առողջապահության բնագավառում մեծագույն նվաճում է, որը մարդկության պատմության մեջ անգնահատելի ներդրում է։
Չինական կողմի համար հետաքրքիր է, թե ինչ կարգով պետք է կիրառվի դեղամիջոցը՝ հիվանդները պետք է գան Հայաստա՞ն, թե՞ դեղամիջոցը պետք է վաճառվի։ Երկու դեպքում էլ Հայաստանում կենսամակարդակը կտրուկ կբարձրանա։ Չինացիները բարեկամ Հայաստանի համար իրո՛ք ուրախ են։
Լ. ԱՎԱԳՅԱՆ
