ՀԱՅԿԱԿԱՆ «ԴՂՅԱԿՆԵՐ» ԻՍՊԱՆԻԱՅՈՒՄ Հայրենիքում հսկայական դղյակներ կառուցելու մարմաջը մեր բարձրաստիճան պաշտոնյաների մոտ նորություն չէ (շատերը նույնիսկ դրա բացատրությունն ունեն, իբր թե փողերը այդպիսով մնում են հայրենիքում, բացի այդ հայրենիքը «նվեր» է ստանում իրենց դղյակների տեսքով): Ինչ-որ տեղ համաձայնելով նման տեսակետ ունեցողների հետ՝ փաստենք սակայն որ այդ մտածողությամբ ստացվում է, թե Տիգրան Սարգսյանը հայրենասեր չէ՞, ինչ է: Արդեն 2 տարի է, ինչ Հայաստանի Հանրապետության Կենտրոնական բանկի նախագահ Տիգրան Սարգսյանը Իսպանիայի ծովափնյա քաղաքներից մեկում գնել է «համեստ» մի դղյակ: Անշուշտ, կենտրոնական բանկի նախագահը, այլ բարձրաստիճան պաշտոնյաների, առավել եւս սովորական քաղաքացիների համեմատ բավականին բարձր (մոտ 2000 դոլար) աշխատավարձ է ստանում, բայց նույնիսկ մոտավոր հաշվարկի դեպքում կարելի է հասկանալ, որ հնարավոր չէ այդ «համեստ» աշխատավարձով դղյակ գնել Իսպանիայում: Մեր ընթերցողներին հիշեցնենք նաեւ, որ արդեն վաղուց պարոն Սարգսյանի ընտանիքը՝ կինը եւ երեխաներն, ապրում են Իսպանիայում: Երեւի, «մարդկայնորեն հասկանալ է» պետք պրն Սարգսյանի այս քայլը՝ ո՞ր տղամարդը թույլ կտա, որ իր ընտանիքն առանց տանիքի մնա՝ այն էլ օտար ափերում: Թեպետ, ՀՀ նախագահը մեկ անգամ կասկածի տակ է դրել հանրապետությունում տղամարդ լինել-չլինելու հարցը. սակայն հիմա դա էական չէ, փաստն այն է, որ Տիգրան Սարգսյանի ընտանիքը վաղուց ապրում է Իսպանիայում, որից 2 տարին՝ սեփական տանը: Եվ եթե հավատանք լուրերին՝ պրն Սարգսյանը, չնայած կնոջ աղերսներին, կտրականապես դեմ է ընտանիքի հայրենիք վերադարձին: Համաձայնեք, որ եթե մեր բարձրաստիճանների դղյակները Հայաստանում են, դրանց գտնվելու վայրը գրեթե բոլորը գիտեն, իսկ հեռավոր իսպանիաներում շատ դժվար է հայտնաբերել դրանք: Այդուհանդերձ, մենք որոշեցինք որոշակի ջանքերի գնով լրագրողական հետաքննություն կատարել՝ պարզելու համար, թե հատկապես ո՞րն է ՀՀ Կենտրոնական բանկի նախագահի տունը Իսպանիայում: Չէ որ, մենք՝ հարկատուներս, պարտավոր ենք իմանալ՝ ուր են հոսում ՀՀ պետբյուջեի միջոցները: Տաքարյուն եւ անմիջական իսպանացիները մեզ մատնացույց արեցին լուսանկարում պատկերված տունը: Հարեւանների հետ զրույցներից պարզեցինք, որ այդ տանն ապրում են օտարերկրացիներ (նրանք չգիտեին, թե կենվորները հատկապես որ ազգի ներկայացուցիչ են), որոնք այդ տունը գնել են մոտ երկու տարի առաջ: Հարեւանների խոսքերով՝ այդ տանը մշտապես ապրում են ընտանիքի կինը եւ երեխաները՝ ի դեպ, նրանցից իմացանք, որ երկրորդ զավակը բոլորովին վերջերս է ծնվել, որ ընտանիքի հայրը ապրում է այլ երկրում, սակայն բավականին հաճախ է այցելում՝ գրեթե ամեն ամիս: Տարօրինակ զուգադիպությամբ Տիգրան Սարգսյանի ընտանիքը եւս ամիսներ առաջ է համալրում ստացել: Սակայն, մեր տեղեկությունների համաձայն պրն Սարգսյանը տարին մեկ անգամ է այցելում ընտանիքին՝ մի՞թե իրական են այն լուրերը, թե ցանկացած պաշտոնական այցելության մեկնելիս (հիշեցնենք, որ այդ այցերը պետության հաշվին են արվում) պրն. Սարգսյանը այցելում է Իսպանիա սիրելի ընտանիքին տեսակցելու: Ցավոք, մեր այցելության ժամանակ հարեւանների մատնանշած տանը ոչ ոք չկար եւ մենք չկարողացանք համոզվել՝ դա՞ է Տիգրան Սարգսյանի դղյակը, թե՞ ոչ: Ցանկացած երկրի կենտրոնական բանկ այդ երկրի առանցքային հիմնասյուներից, թերեւս կարեւորագույնն է, որը սակայն, փակ համակարգ լինելով՝ապահովագրված է հրապարակային քննարկումների ակտիվ նյութ լինելուց: Թե լրատվամիջոցները, թե պատգամավորները այս թեմային հազվադեպ են անդրադառնում՝ հենց իր փակ, ոչ թափանցիկ լինելու պատճառով: Կենտրոնական բանկի թեման քննարկման առարկա է դառնում, թերեւս միայն բյուջետային քննարկումների ժամանակ, երբ այս գերատեսչությունը տարեկան իր ծախսերի համար աստղաբաշխական թվեր է ներկայացնում: Ստացվում է, որ թե լրագրողները, թե նույնիսկ ամենաակտիվ ելույթներ ունեցող պատգամավորները չեն կարողանում ժողովրդին հասցնել պետության կարեւորագույն համակարգի իրական վիճակը: Արդյունքում, կամ ավելի ճիշտ այս ամենի հետեւանքով՝ ի տարբերություն ցանկացած երկրի՝ մեր Կենտրոնական բանկը հայտնվում է շահեկան վիճակում եւ դրա նախագահ Տիգրան Սարգսյանը պետության, ասել է թե, ժողովրդի ֆինանսական միջոցների հետ վարվում է այնպես, ինչպես սեփական պապենական ժառանգության հետ: ՄԱՆԵ ԳԱԼՈՅԱՆ Իսպանիա-Հայաստան
