ՆԱԽԱԳԱՀԸ ԴԻԱԳՆՈՍՏԻԿ ԿԵՆՏՐՈՆԻ ԱՇԽԱՏԱԿԻՑ ՉԷ ՀՀ ԱԺ ամբիոնի եռօրյա «պաշարումը», որ սկիզբ էր առել դեռ երկուշաբթի՝ նախագահ Քոչարյանի պաշտոնանկության հարցի քննարկման պատճառով, գոնե նորանկախ Հայաստանի պատմության մեջ աննախադեպ երեւույթ էր: Պատգամավոր Խորեն Սարգսյանը դա չհամարեց ընդդիմության հաղթանակ կամ իշխանության տապալում. «Արձանագրվեց, որ Հայաստանում իշխանություններն ի վիճակի չեն ղեկավարել երկիրը»: Այլ համատեքստում, բայց նույն կարծիքը հայտնեց «Հանրապետություն» կուսակցության քաղխորհրդի անդամ Արամազդ Զաքարյանը: Վերջինս՝ անդրադառնալով նախորդ օրը ՀԺԿ-ի եւ «Հանրապետության» ներկայացուցիչներին Արաբկիրի ՆԳ բաժին բերման եւ վարչական կալանքի կամ տուգանքի ենթարկելու փաստին, նկատեց. «Այդ քայլերը վախկոտության դրսեւորումներ են: Վստահեցնում եմ, որ իշխանությունները այլեւս ի վիճակի չեն վերահսկելու քաղաքական դաշտն ու քաղաքական զարգացումները»: Երեկ հնարավոր չէր բացառել, որ խորհրդարանի պատերի ներսում կարող էին բռնություններ կիրառվել ընդդիմադիր պատգամավորների նկատմամբ: Բարեբախտաբար, այդ կանխատեսումներն ի չիք դարձան: Այդուհանդերձ, դրսում՝ Դեմիրճյան փողոցում, հավաքված ընդդիմության համակիր քաղաքացիները ոչ միայն սպասում էին նման զարգացումների, այլեւ՝ յուրովի վերլուծում էին Ռ.Քոչարյանի ճեպազրույցը: Նույնի մեկնաբանության խնդրանքով մենք դիմեցինք նաեւ 13 կուսակցությունների միասնական շտաբի ղեկավար Վաղարշակ Հարությունյանին: Անդրադառնալով նախագահի, ըստ էության, ընդդիմադիր պատգամավորներին հասցեագրված այն դիտարկմանը, թե ԱԺ-ում տեղի ունեցածը խուլիգանություն է, Վ.Հարությունյանը հայտարարեց. «Ես նախագահի հետ համաձայն եմ. ԱԺ-ում կատարվածը խուլիգանություն էր, եւ դրա հեղինակը խորհրդարանական մեծամասնության ներկայացուցիչն էր: Իսկ Ռ.Քոչարյանը դիմում էր այդ խուլիգաններին, որ ԱԺ-ում այդ ոճով շարունակեն հարցեր լուծել»: Նախորդ օրը նախագահ Քոչարյանը հայտարարել էր, թե իր պաշտոնանկության հարցն օրակարգ մտցնելն անօրինականություն կլիներ, որովհետեւ ԱԺ «27»-ի հանձնաժողովի եզրակացությունը, որի հիման վրա ներկայացվել էր իր պաշտոնանկության նախագիծը, ոչ մի կապ չուներ այդ հանձնաժողովին վերապահված լիազորությունների հետ՝ «ինչ-որ տեղ խախտումներով, ինչ-որ տեղ մի նախադասություն գնաց…»: Վ.Հարությունյանը երեկ հակադարձեց նախագահին՝ «Նա բարոյական իրավունք չուներ պատասխանել ԱԺ օրակարգ մտած նախագծի քննարկման օրինականության-անօրինականության խնդրին, որովհետեւ դա վերաբերում էր հենց իր իմփիչմենթին: Նման հարցադրում ուղղելը Ռ.Քոչարյանին, նույնն է թե՝ Նաիրի Հունանյանին հարցնել՝ դու դավաճա՞ն ես, ու նա էլ պատասխանի՝ ես դավաճան չեմ, ռոմանտիկ եմ»: Բայց որքան հիշում ենք՝ Ռ.Քոչարյանն ինքն այդ հարցը ոչ կոռեկտ չէր համարել: «Նշանակում է, որ ինքը չգիտի՝ ինչն է կոռեկտ, ինչը՝ ոչ»,- նկատեց պաշտպանութան նախկին նախարարը: Ռ.Քոչարյանն իր հայտարարությամբ նաեւ ընդդիմադիր պատգամավորներին թափանցիկ ակնարկ էր արել՝ սպառնալով, թե իրենք ցույց են տալու, որ կարգը պարտադիր է նաեւ պատգամավորի համար: «Կարգազանցներին» կարգի հրավիրելը, պատժելը Ռ.Քոչարյանի մեծ ցանկությունն է, բայց ոչ իրավունքը»,- վստահեցրեց Վ.Հարությունյանը՝ բացառելով ընդդիմադիր պատգամավորների նկատմամբ բռնությունների կիրառումը՝ հենց միայն այն պատճառով, որ դրա համար հիմքեր չկան: Թեեւ հայտնի է, որ մեր երկրում շատ բաներ անելու համար առանձնակի հիմքեր պետք էլ չեն գալիս: «Դե, թող ինքը փորձի: Ես համոզված եմ, որ նման բան չի անի»,- հավաստիացրեց Վ.Հարությունյանը: Գրեթե նույն հարցադրումներին պատասխանեց նաեւ «Հանրապետություն» կուսակցության քաղխորհրդի անդամ, նախկին վարչապետ Արամ Սարգսյանը: Բայց մինչ դրանց անցնելը վերջինս անդրադարձավ Ռ.Քոչարյանի՝ «…կան մարդիկ, որոնք այլ մասնագետի կարիք ունեն» հայտարարությանը: Ա.Սարգսյանն այդ առնչությամբ նկատեց. «Կարծում եմ, երկրի պետական, առավել եւս՝ նախագահական ինստիտուտներին առողջապահական տեսանկյունից հարցեր ներկայացնելն ու նման հայտարարություններ անելը պատիվ չի բերում: Երկրի նախագահը դիագնոստիկ կենտրոնի աշխատող չէ»: Ինչ վերաբերում է ԱԺ-ում կատարված խուլիգանությանը, ապա Ա.Սարգսյանը լիովին կիսեց Վ.Հարությունյանի տեսակետը, թե խուլիգաններն ԱԺ մեծամասնությունն էր՝ իր ղեկավարությամբ հանդերձ: Ընդդիմադիր օրենսդիրների հասցեին հնչած սպառնալիքների մասին պրն Սարգսյանն ասաց. «Գիտեք, դա շատ նման էր Նաիրի Հունանյանի սպառնալիքներին, եթե դրանց միջեւ փորձեք զուգահեռներ տանել: Ն.Հունանյանն էլ էր ասում, թե ինքը ոչ թե ահաբեկիչ է, այլ՝ վրիժառու: Ինչ վերաբերում է ԱԺ «27»-ի հանձնաժողովի իրավասությունների ու լիազորությունների, իբր, գերազանցմանը, ապա հարկ եմ համարում նկատել, որ հանձնաժողովն ընդամենը արձանագրել է այն, ինչում Հայաստանում որեւէ մեկը, նույնիսկ ինքը՝ նախագահը, չի կասկածում՝ «27»-ը վտանգել է Հայաստանի անվտանգությունը», որ եթե համապատասխան մարմիններն իրենց աշխատանքը կատարեին՝ «27»-ը տեղի չէր ունենա: Սրանք ակնհայտ ճշմարտություններ են, եւ ցանկացած մեկը, որեւէ հանձնաժողով, առավել եւս՝ «27»-ի գործին առնչվող, միանգամայն կարող էր նման եզրակացության հանգել: Դա նույնն է թե՝ ասել, որ իմ փաստաբանները, բացի «27»-ի քրգործի նյութերն ուսումնասիրելուց, այլ եզրակացություններ անելու իրավունք չունեն»: Մեր այն հարցը, թե՝ ընդդիմությունը ԱԺ ամբիոնը մտադիր է «պաշարել» նաեւ հնարավոր արտահերթ նիստերի ժամանա՞կ, պարզաբանեց, թե ընդդիմության խնդիրն արտահերթ նիստերի առումով այլ է. «Մենք գործում ենք օրինականության շրջանակներում: ԱԺ կանոնակարգի հոդված 22-ի 4-րդ կետն ապահովում էր հարցի քննարկումը հերթական նիստում՝ արտահերթ կարգով եւ առանց քվեարկության: Արտահերթ նիստի մասով նման օրենք չկա, եւ մենք նման բան չենք կարող պնդել: Բայց այս պահից ուզում եմ արձանագրել՝ Ռ.Քոչարյանն այլեւս երկրի նախագահ չէ, այլ՝ նախագահի ժամանակավոր պաշտոնակատար՝ մինչեւ աշուն: Խորհուրդ կտայի գործադիր եւ օրենսդիր մարմինների ներկայացուցիչներին, ովքեր սիրում են ու լավ սակարկություն անել գիտեն՝ թող առեւտուր անեն եւ հնարավորինս շատ բան պոկեն այս նախագահից»: ԱԺ լուծարման հնարավորության մասին նախկին վարչապետն ասաց. «Բացարձակ մտավախություն չունեմ այդ իմաստով: Դա կլինի Ռ.Քոչարյանի կարիերայի վերջնակետը: Եթե նման բան անի, ես էլ ստիպված առողջապահական թեմաներից կխոսեմ»: Գուցե այդ անհոգության պատճառն այն է, որ ընդդիմությունը՝ Քոչարյանի պաշտոնանկության հարցն արդեն օրակարգում համարելով, կարծում է, թե նախագահն օրենքով սահմանված կարգով այլեւս իրավունք չունի՞ ԱԺ-ն լուծարել: «Միանշանակ: Այդ հարցն արդեն օրակարգում է, եւ հերթական եռօրյա նիստերի տապալումը ԱԺ մեծամասնության կողմից՝ հենց դա է ապացուցում: Եթե մինչեւ սեպտեմբեր Ռ.Քոչարյանը դեռ նախագահ լինի, ապա ԱԺ աշնանային նստաշրջանն անպայման սկսվելու է հենց նրա պաշտոնանկության հարցով»: ՆԱԻՐԱ ՄԱՄԻԿՈՆՅԱՆ
