ԱԺ պատգամավոր Վիկտոր Դալլաքյանը երեկ մտահոգություն հայտնեց Ադրբեջանի եւ Հայաստանի բյուջեների ու տնտեսական այլ ցուցանիշների համեմատության կապակցությամբ՝ նշելով, թե «Լեռնային Ղարաբաղի հետ կապված լուծումները ռազմական հարթությունից տեղափոխվել են տնտեսական մրցակցության հարթություն»:
Մեջբերեց որոշ թվեր. «Հայաստանի պետական բյուջեն կազմում է 1.4 միլիարդ ԱՄՆ դոլար, այն դեպքում, երբ Ադրբեջանի պետբյուջեն, ռազմական ծախսերի կտրվածքով՝ ավելի քան 1 միլիարդ դոլար է»: Ըստ Վիկտոր Դալլաքյանի՝ Ադրբեջանի բյուջեն 2003-2007-ին աճել է 8 անգամ, իսկ մերը՝ 4 անգամ, եւ Ադրբեջանը միայն նավթից կարող է ստանալ տարեկան 7 միլիարդ դոլար: «2007-ի նախօրյակին՝ 2006-ի 9 ամիսների կտրվածքով, Ադրբեջանի տնտեսական աճը կազմում է 34 տոկոս, իսկ Հայաստանինը՝ 12.5 տոկոս»,- նաեւ նշեց նա:
Արձագանքելով այս համեմատություններին՝ ՀՀԿ խմբակցության պատգամավոր Արմեն Աշոտյանը հայտարարեց. «Շատ է շահարկվում Բաքու-Թբիլիսի-Ջեյհան նավթատարի գերկարեւորությունը: Իհարկե, լավ կլիներ, որ մենք էլ լինեինք այդ նախագծի մեջ: Սակայն նույն ադրբեջանական պետական այրերի հավաստմամբ՝ 2007-ի ընթացքում Ադրբեջանն այդ նախագծից ստանալու է ընդամենը 15 մլն դոլար: Դա այնքան փոքր գումար է իրենց համար, որ անգամ ներգրավված չէ 2007-ի բյուջեի եկամտային մասում: Բաքու-Թբիլիսի-Ջեյհանն աշխատում է 50 տոկոս ծանրաբեռնվածությամբ: Դիցուք՝ ղազախական նավթը գնաց այդ նավթամուղով եւ իրենք ստացան տարեկան 30 մլն դոլարով ավելին: Ի՞նչ է, սա կարող է վճռորոշ նշանակությո՞ւն ունենալ ԼՂ խնդրի լուծման հարցում: Ի՞նչ է, կարծում եք՝ մեր բանակը, մեր զինվորը, մեր ժողովուրդը պատրաստ է 30 մլն դոլարի տարբերությամբ զիջե՞լ հողերը: Կարծում եմ, որ ոչ մեկս այստեղ դրան չենք հավատում»: Իսկ անդրադառնալով Ադրբեջանի բանակի բյուջեի ավելացմանը՝ պրն Աշոտյանն ասաց, թե իրականում 900 մլն դոլար է նախատեսվել ռազմական ծախսերի համար. «Գաղտնիք չեմ բացի, եթե ասեմ, որ այդ գումարի հսկայական մասը նախատեսված է մի շարք գեներալների նավթային կերակրատաշտակից օգտվելու հնարավորություն տալու համար»:
