ԵԹԵ ՍԵՐԺ ՍԱՐԳՍՅԱՆԸ ՀՀ ՆԱԽԱԳԱՀ ՉԴԱՌՆԱ

Այդ դեպքում, ըստ ՀՀ նախագահի խորհրդականի, ողբերգություն չի լինի

Երեկ լրագրողները փորձել են «Ուրբաթ» ակումբում հյուրընկալված ՀՀ նախագահի անվտանգության հարցերով խորհրդական Գառնիկ Իսագուլյանից իմանալ նրա վերաբերմունքը «Հակակրիմինալ» շարժման բացահայտումների վերաբերյալ: Ըստ lragir.am-ի, պարոն Իսագուլյանը նախ ասել է, թե ծանոթ չէ շարժման հրապարակումներին ու հայտարարություններին, բայց հետո իրեն անհայտ հրապարակումները գնահատելով՝ վստահեցրել է, թե այն բացահայտումները, որոնք անում է այդ շարժումը, բոլորը զրպարտություն են, ինչպես որ զրպարտություն է Սահմանադրության հանրաքվեն կեղծելու մասին հայտարարությունը: Իսագուլյանը նաեւ խոստովանել է, թե չգիտի՝ ովքեր են «հակակրիմինալները», բայց իմանալուց հետո, որ նրանցից մեկը «ՆԺ» կուսակցության նախագահ Արամ Կարապետյանն է, հայտարարել է. «Դեռ հարց է, թե ով է կրիմինալ՝ նրանք, ում մասին նշում է Արամ Կարապետյանը, թե հենց ինքը»:

Իհարկե, Գ. Իսագուլյանի ասուլիսը «հակակրիմինալին» առնչվող թեմայով չի սահմանափակվել: Նա անդրադարձել է նաեւ ամիսներ առաջ իր իսկ արած հայտարարությանը, թե Ռոբերտ Քոչարյանը նախագահի պաշտոնը թողնելուց հետո էլ շարունակելու է մեծ ազդեցություն ունենալ Հայաստանի քաղաքական դաշտի վրա: Հաստատելով իր այդ պնդումը՝ Գ. Իսագուլյանը, ըստ lragir.am-ի, չի մասնավորեցրել, թե հատկապես ի՞նչ կարգավիճակով է Քոչարյանը տարածելու իր ազդեցությունը: Ի պատասխան լրագրողների այն հարցին, թե՝ ի վերջո, ո՞ւմ հետ է լինելու Իսագուլյանն իր գլխավորած «Ազգային անվտանգություն» կուսակցությամբ, ՀՀԿ-ի՞, թե՞ «Բարգավաճ Հայաստանի», պատասխանել է. «Ես կարծում եմ՝ մենք վաղուց կողմնորոշվել ենք, թե ում հետ ենք լինելու: Ժամանակը կգա՝ կիմանաք»:

ՀՀ նախագահի խորհրդական Գառնիկ Իսագուլյանը ՀՀ նախագահի պաշտոնում նախընտրելի թեկնածու է համարում պաշտպանության նախարար Սերժ Սարգսյանին: Իսկ թե ի՞նչ կլինի, եթե Ս. Սարգսյանը հանկարծ Հայաստանի նախագահ չլինի, պարոն Իսագուլյանն ասել է. «Ուրեմն, միշտ մենք փորձում ենք, հա, ինչ-որ բան ստեղծել: Այո, իմ տեսակետը ես հայտնել եմ եւ մնում եմ իմ տեսակետին: Եկեք ժամանակից առաջ չընկնենք եւ ենթադրություններ չանենք՝ ինչ կլինի, եթե այսպես լինի, այ, իսկ եթե այսպես լինի: Եկեք սպասենք, ժամանակը կգա, կլինի, եւ ըստ այդմ, համապատասխան, ուրեմն կարծում եմ, գործընթացներ կծավալվեն: Խնդիր չկա, եւ այստեղ ես ողբերգություն չեմ տեսնում, որ Դուք խոսում եք՝ եթե չլինի: Սպասենք՝ տեսնենք, դեռ կգան նախագահական ընտրությունները, կանցնեն եւ դրանից հետո նոր այդ հարցին կանդրադառնանք»: