ՇԱՏ ՊԱՐԱՊԵԼՈՒՑ ՀԻՎԱՆԴԱՆՈՒՄ ԵՆ

Դրանից խուսափելու համար բժիշկները խորհուրդ են տալիս պարապել ռեժիմով եւ քիչ ծանրաբեռնվածությամբ

«Քննությունն ինձ համար միշտ տոն է»՝ այս հայտնի արտահայտությունը թերեւս չի վերաբերում «Առավոտի» զրուցակից, ԵՊՀ ուսանողուհի Արփինե Սահակյանին: Նա քննությանը պատրաստվելու պատճառով հայտնվել է բժիշկների ձեռքում: «Քանի որ Ամանոր էր՝ չէի հասցրել նախօրոք պատրաստվել հունվարի 7-ին նշանակված քննությանը: Երկու օր առաջ սկսեցի պատրաստվել: Հունվարի 6-ի երեկոյան ժամը յոթն էր, դեռ 20 հարցի չէի հասցրել անդրադառնալ: Ուստի տասնհինգ րոպե հաճախականությամբ մի բաժակ սեւ սուրճ էի խմում, որ գիշերը կարողանամ արթուն մնալ ու պարապել: Երբ չորս բաժակ սուրճ արդեն խմել էի, զգացի, որ հակառակ երեւույթն է ինձ մոտ սկսվում. գլուխս պտտվում է, աչքերիս առաջ սեւանում, տարօրինակ զգացողություններ ունեմ… Մեկ էլ արթնանում եմ ու տեսնում, որ պառկած եմ անկողնումս, կողքիս էլ բժիշկներ են նստած: Պարզվեց՝ ճնշումս ահավոր բարձրացել էր, եւ ես ընկել էի ինչ-որ տարօրինակ շոկի մեջ: Հաջորդ օրն ի վիճակի չէի քննության ներկայանալ, ուստի ստիպված պիտի «բաց դռներին» հանձնեմ այն»,- պատմեց քննության «զոհ» դարձած ուսանողուհին:

Այսպիսի իրավիճակներում հայտնվելու պատճառն այն է, որ ուսանողների մի ականջից մտնում, մյուսից դուրս են գալիս դասախոսների հորդորները՝ քննությանը պատրաստվեք ոչ թե վերջին մի քանի օրում, այլ՝ դասերի ընթացքում: Մյուս կողմից էլ մի քանի օրում անգիր արած գիտելիքները որքան շուտ հայտնվում, այնքան արագ էլ դուրս են թռչում գլխից: Մի քանի օրում մի քանի գիրք կարդալը եւ ուղեղի այլ տիպի ծանրաբեռնվածությունները, ըստ բժիշկների, կարող են լուրջ հիվանդությունների պատճառ դառնալ:

Թերապեւտ Գայանե Միրումյանը «Առավոտի» հետ զրույցում նշեց. «Ուղեղի ծանրաբեռնվածությունից կարող են առաջանալ նեւրոզներ: Չնայած բժշկության մեջ նեւրոզները հիվանդություն չեն համարվում, սակայն կարող են բազում լուրջ հիվանդությունների առաջացման պատճառ դառնալ: Ցավոք, այսօր երիտասարդների շրջանում երեքից մեկն ունի վեգետանեւրոզ, այսինքն՝ գործառութային խանգարումներ: Իսկ ծանրաբեռնվածությունից կարող են առաջանալ ճնշման տատանումներ, անքնություն, թթվածնային քաղց եւ այլ բարդություններ»: Այսպիսի բարդություններից խուսափելու համար Գ. Միրումյանը ուսանողներին խորհուրդ է տալիս. «Առույգ լինելու համար անհրաժեշտ է գիշերը գոնե 7 ժամ քնել: Ամեն օր պիտի զբաղվել մարմնամարզությամբ: Քննական շրջանում լավ կլինի, որ երիտասարդները մեղրաջուր խմեն, շատ միրգ ուտեն, սնվեն սպիտակուցներով հարուստ սննդով: Քանի որ քննություններին պատրաստվելիս ուսանողները շատ են հոգնում, ապա նրանց անհրաժեշտ է կուտակել դրական լիցքեր՝ օրվա ընթացքում գոնե կես ժամ սիրած գործով զբաղվելով եւ երաժշտություն լսելով»:

Մեզ հետ զրույցում ուսանողների մեծամասնությունը խոստովանեց, որ իրենց չի հաջողվում դասերի ընթացքում պարապել, եւ ամեն ինչ թողնում են վերջին օրերին: Նաեւ համաձայնեցին «Առավոտին» բացահայտել որոշ ուսանողական գաղտնիքներ, որոնք կարող են բարձր գնահատական ստանալու երաշխիք դառնալ: Իհարկե, նրանցից ոչ մեկը չխոսեց կաշառք տալու ձեւերի եւ պայմանների մասին: Վ. Բրյուսովի անվան լեզվաբանական համալսարանի ուսանողուհի Արուսիկ Հարությունյանը նկատեց. «Երբեմն դասախոսի հնչեցրած հարցից հնարավոր է լինում կռահել ճիշտ պատասխանը»: Ապագա հոգեբան Արփի Հայրապետյանն էլ ասաց. «Եթե տվյալ հարցի պատասխանն այնքան էլ լավ չգիտես, պետք չէ հրաժարվել պատասխանելուց: Պարզապես՝ պատասխանելու ժամանակ անհրաժեշտ է նայել դասախոսի հոնքերի միջեւ եղած տարածությանը: Դա շեղում է զրուցակցի ուշադրությունը, եւ նա չի էլ հասկանում, որ պարզապես չի լսում դիմացինի ասածները: Այս թեզը ոչ թե ես եմ հորինել, այլ ապացուցվել է հոգեբանական բազում փորձերի ընթացքում»: