Նախկին ԱԺ պատգամավոր Սասուն Միքայելյանի պատժի հետ կապված՝ գեներալներ Գուրգեն Դալիբալթյանը եւ Արկադի Տեր-Թադեւոսյանը նամակով դիմել են ՀՀ նախագահ Սերժ Սարգսյանին:
«Մեծարգո նախագահ, տեւական անազատության մեջ կտրուկ վատացել է ազատամարտիկ, Մարտական երկրորդ աստիճանի խաչի ասպետ, սիրված հրամանատար, արցախյան ազատամարտի նվիրյալ Սասուն Միքայելյանի առողջական վիճակը: Անկախ այն բանից, թե ինչ հանգամանքների պատճառով է նա հայտնվել անազատության մեջ, ըստ էության, վտանգված է մարդկային կյանք, մի մարդու կյանք, որն անմնացորդ նվիրված է եղել արցախյան ազատամարտին եւ մեր երկրի սահմանների պաշտպանությանը: Տվյալ դեպքում մենք առաջնորդվում ենք ոչ միայն մարդասիրական մղումներով, այլեւ որպես ականատես ու գործընկեր՝ բարձր գնահատելով Սասուն Միքայելյանի հերոսական անցյալը եւ անուրանալի վաստակը: Ելնելով վերոնշյալից, խնդրում ենք Ձեզ, օգտվելով ՀՀ նախագահի Ձեր լիազորություններից, միջնորդել Սասուն Միքայելյանին առողջության բերումով ազատել պատժի հետագա կրումից»,- ասված է նամակում:
