Ուկրաինական դատարանը Ստալինին ճանաչել է որպես մարդասպան: Կիեւի վճռաբեկ դատարանի որոշումը, որով 1930թ.-ին Ուկրաինայում եղած սովը՝ գոլոդոմորը, ճանաչվել է որպես ուկրաինացի ժողովրդի ցեղասպանություն, Ռուսաստանի հետ գժտվելուն ուղղված ծրագրի մի մասն է: «Newsru»-ի փոխանցմամբ, նման կարծիք է հայտնել ՌԴ Պետդումայի նախագահ Բորիս Գրիզլովը: «Գոլոդոմորի եւ ԽՍՀՄ իշխանության կողմից 30-ականներին ուկրաինացի ժողովրդի նկատմամբ ցեղասպանություն գործելու գաղափարը բացարձակապես անհիմն է»,- ասել է Գրիզլովը: Իր հերթին Դումայի՝ միջազգային հարաբերությունների հարցերով հանձնաժողովի նախագահ Կոնստանտին Կոսաչեւը հայտարարել է, թե դատարանի կողմից «այսպես կոչված՝ գոլոդոմորի գնահատականը լուսանցքային է» եւ Ուկրաինայի գործող նախագահի նախընտրական քարոզարշավի մաս է կազմում:
Փոխարենը Ուկրաինայի նախագահ Յուշչենկոն, մեկնաբանելով Կիեւի դատարանի սույն որոշումը, հույս է հայտնել, որ այն միջազգային իրավունքի համար նախադեպ կդառնա. «Ուկրաինական դատարանի որոշումը գոլոդոմորի շուրջ բանավեճերը քաղաքականից տեղափոխում է իրավական հարթություն: Այսուհետեւ գոլոդոմորի շուրջ բանավեճերում միակ փաստարկը կարող են լինել փաստերը, այլ ոչ թե քաղաքական կամ պատմական ստերեոտիպերն ու միֆերը»:
Ուկրաինայի նախագահը վստահ է, որ Կիեւի դատարանի որոշումը «լրացուցիչ փաստարկ կլինի Ուկրաինայի խորհրդարանի համար՝ մարդկության դեմ կատարված այդ հանցագործությունը մերժողներին քրեական պատասխանատվության ենթարկելու մասին օրենք նախատեսելու գործում»: Յուշչենկոն միաժամանակ առաջարկել է կոմունիստական ռեժիմից տուժած Արեւելյան Եվրոպայի պետությունների առաջնորդներին՝ Ռուսաստանին, Լեհաստանին, Վրաստանին, բալթյան եւ մյուս երկրներին՝ միջազգային համաձայնագիր ստորագրել այդպիսի տրիբունալի ստեղծման շուրջ:
