![\"\"](\"https://www.aravot.am/2010/aravot_arm/December/16/p10.jpg\")
«Մի խեղաթյուրեք փաստերը». «Հայաստանում հիմնական լեզուն հայերենն է»… Երեկ այս բովանդակությամբ պաստառներով շուրջ 140 երիտասարդներ, «Ընդդեմ հանրագիտարանային կեղծիքի» նախաձեռնության հետ, բողոքի ցույց էին կազմակերպել ընդդեմ բրիտանական հանրահայտ հրատարակչության թույլ տված սխալի: Հիշեցնենք, որ խեղաթյուրված փաստերով հանրագիտարանը արտատպվել է նաեւ ռուսական մի հրատարակչության կողմից:
Հանրագիտարանային կեղծիքի դեմ պայքարողների երթը սկսվեց Ստ. Շահումյանի անվան հրապարակից դեպի Ռուսաստանի, ապա Մեծ Բրիտանիայի դեսպանատներ: Երկու երկրների դեսպաններին հանձնվեցին բողոք- նամակներ:
«Նամակի միջոցով մենք դեսպանների աջակցությունն ենք ակնկալում եւ հորդորում միջամտել հանրագիտարանում Հայաստանի վերաբերյալ կեղծ տեղեկատվությունների հերքման պահանջի իրականացմանը՝ կանխելու համար հետագա հրատարակությունների ժամանակ նույն կեղծիքի տարածումը: Մեզ մնում է միայն սպասել դեսպանների աջակցությանը, քանի որ նախաձեռնությունը ավելին անել այլեւս չի կարող, քանի որ Հայաստանի ԿԳՆ-ն եւ ԱԱԾ-ն պատասխանել են, որ նման գործառույթ եւ լիազորություն չունեն՝ միջամտելու մասնավոր հրատարակչության աշխատանքին»,- ասաց «Ընդդեմ հանրագիտարանային կեղծիքի» նախաձեռնության անդամ Անի Գասպարյանը:
