![\"\"](\"https://www.aravot.am/2011/aravot_arm/July/13/p19.jpg\")
Ֆրանսիայի արտաքին գործերի նախարար Ալեն Ժյուպեն (նկարում) հայտարարել է, թե Ֆրանսիայի իշխանությունները կապ են հաստատել Լիբիայում իշխող ռեժիմի հետ՝ քննարկելու համար Մուամմար Քադդաֆիի հեռանալու հարցը, սակայն լիարժեք բանակցություններ չեն վարում: Այս մասին՝ վկայակոչելով France Info ռ/կ-ն, փոխանցում է 1in.am-ը: «Լիբիայի ռեժիմը պատվիրակներ է ուղարկել ամենուր՝ Թուրքիա, Նյու Յորք եւ Փարիզ: Կապը հաստատված է, սակայն այսօր իրական բանակցություններ չեն վարվում: Մենք ընդունել ենք բանագնացների, որոնք մեզ ասել են՝ Քադդաֆին պատրաստ է հեռանալ, եկեք բանակցենք»,- ասել է Ժյուպեն: Նա նաեւ հավելել է, թե Քադդաֆիի վարչակազմը դեռ չի կատարել ՆԱՏՕ-ի ռազմական գործողությունները դադարեցնելու համար անհրաժեշտ պայմանները: Դաշինքն ակնկալում է, որ իրավիճակը կանցնի ՄԱԿ-ի վերահսկողության տակ այն բանից հետո, երբ զինվորականները կվերադառնան զորամասեր, իսկ Քադդաֆին կհայտարարի քաղաքական եւ զինվորական լիազորություններից հրաժարվելու մասին:
Հիշեցնենք, որ ռազմական գործողությունների դադարեցման մասին երեքշաբթի օրը խոսել է նաեւ Ֆրանսիայի պաշտպանության նախարար Ժերար Լոնգեն, որն ապստամբներին կոչ էր արել ուղիղ բանակցություններ սկսել Քադդաֆիի ռեժիմի հետ:
