Շատ զարգացած երկրներում կրոնի մի տեսակ կա, որը կոչվում է մարդու իրավունք. դա հեթանոսական կրոնի տեսակ է, որտեղ մարդը վերածվում է պաշտամունքի առարկայի, եւ աբորտի կողմնակիցները համարում են, որ պտուղը կնոջ մարմնի մի մասն է, եւ ինչ ուզի՝ կարող է անել: Այսօր «Հենարան» ակումբում հղիության արհեստական ընդհատման վերաբերյալ քննարկվող թեմայի շուրջ այս տեսակետները հայտնեց Կոտայքի թեմի Ջրվեժի սուրբ Կաթողիկե եկեղեցու հոգեւոր հովիվ տեր Կյուրեղ քահանա Տալյանը: Նրա խոսքերով. «Այդ ամենի հիմքում հաճույքներն են, վայելքը, սեռական սանձարձակությունը: Մարդկային էակը սկսում է իր կյանքը բեղմնավորման պահից, այդ էակի ոչնչացումը հավասար է մարդասպանության»:
Հոգեւոր հովվի ներկայացմամբ, այսօր դպրոցներում, այլ հաստատություններում անվտանգ սեքսի քարոզով մարդկությունն Աստծո ստեղծած հազարավոր տարիների բարոյական նորմերը փոփոխում է եւ հարմարեցնում իրենց:
Aravot.am-ի այն հարցին, թե ինչո՞ւ է քահանան դեմ անվտանգ սեքսի քարոզին, չէ՞ որ դա ինչ-որ կերպ նպաստում է մի շարք հիվանդությունների կանխարգելմանը՝ տեր Կյուրեղը պատասխանեց. «Դեմ եմ ամենաթողությանը: Այդ քարոզով ասում են՝ ինչ ուզում եք արեք՝միայն թե չվարակվեք»: Մեր այն դիտարկմանը, որ սեռական ցանկությունն էլ Աստծված մարդու հետ է ստեղծել, ի՞նչ կարող է անել մարդը, երբ նման ցանկություն ունի, հոգեւոր հովիվը պատասխանեց. «Սեռական ցանկությունը Աստված տվել է, որպեսզի մարդը սերունդներ ունենա եւ մարդկային ցեղը շարունակվի: Աստված դրել է նորմեր. ոչ ոք չի արգելում սեռական հարաբերությունները, բայց դա պետք է լինի օրինական ամուսնության ճանապարհով, որովհետեւ պսակը, ամուսնական հարաբերութունները Աստված օրհնում է: Մնացած ամեն ինչ բարոյականությունից դուրս է»:
Ինչ վերաբերում է անվտանգ սեքսի քարոզին, ապա հոգեւոր հովիվն այսպես մեկնաբանեց իր դեմ լինելը. «Դա մղում է երիտասարդությանը ամենաթողության. ուղղակի զգուշորեն իրենց կրքերը բավարարելուն»:
Կարդացեք նաև
Նելլի ԲԱԲԱՅԱՆ
