ՀՀ ԱԳ նախարար Էդվարդ Նալբանդյանը երկու օր առաջ ներկա էր Չեխիայի հանրապետությունում Հայաստանի դեսպանատան բացմանը, իսկ երեկ արդեն Հայաստանի դեսպանատունը բացվեց Դանիայում՝ Կոպենհագենում: Ինչպես տեղեկանում ենք ՀՀ ԱԳՆ հաղորդագրությունից՝ պարոն նախարարը Դանիայում է գտնվում պաշտոնական այցով: « ԱԳ նախարարի այցելության օրակարգի առաջին կետն էր Դանիայի Թագավորությունում Հայաստանի Հանրապետության դեսպանատան պաշտոնական բացման արարողությունը, որին ներկա էին Դանիայի Եվրոպական հարցերով նախարար Նիկոլայ Վամենը, ԱԳՆ բարձրաստիճան պաշտոնյաներ, Կոպենհագենում հավատարմագրված դեսպաններ, հայկական համայնքի ներկայացուցիչներ: Հայաստանի օրհներգի հնչյունների ներքո Դանիայում ՀՀ դեսպան Հրաչյա Աղաջանյանը բարձրացրեց Հայաստանի Հանրապետության պետական դրոշը: Այնուհետեւ արտգործնախարար Էդվարդ Նալբանդյանն ու Դանիայի Եվրոպական հարցերով նախարար Նիկոլայ Վամենը կտրեցին կարմիր ժապավենը:
Իր խոսքում Էդվարդ Նալբանդյանն անդրադարձավ հայ-դանիական պատմական առնչություններին, Հայոց ցեղասպանության տարիներին դանիացի միսիոներների կողմից հայ գաղթականների եւ որբերի հանդեպ ցուցաբերած մարդասիրությանը, 1988 թ. երկրաշարժից հետո Հայաստանին Դանիայի կողմից ցուցաբերած օգնությանը, ինչպես նաեւ անկախությունից ի վեր Հայաստանի զարգացմանն ուղղված աջակցությանը: Հայաստանի արտաքին քաղաքական գերատեսչության ղեկավարը վստահություն հայտնեց, որ դեսպանությունն իր լուրջ ներդրումը կունենա բարեկամ Դանիայի հետ համակողմանի հարաբերությունների խորացման գործում: ՀՀ դեսպանության բացման արարողությանը ելույթ ունեցավ նաեւ Դանիայի Եվրոպական հարցերով նախարար Նիկոլայ Վամենը: Իր խոսքում նախարար Վամենը նշեց, որ սա յուրահատուկ օր է, քանի որ դեսպանություններ ամեն օր չեն բացվում, իսկ վերջին անգամ Կոպենհագենում նման իրադարձություն տեղի էր ունեցել 2007թ.: Նա բարձր գնահատեց Դանիայում դիվանագիտական ներկայացուցչություն հիմնելու վերաբերյալ Հայաստանի իշխանությունների որոշումը: Նիկոլայ Վամենն եւս իր խոսքում անդրադարձավ հայ-դանիական պատմական կապերին, դանիացի միսիոներների մարդասիրական գործունեությանը, գոհունակություն հայտնեց այսօր ակտիվորեն զարգացող Հայաստանի եւ Եվրոպական միության միջեւ հարաբերությունների կապակցությամբ եւ հույս հայտնեց, որ համատեղ ջանքերով երկկողմ հարաբերությունները լուրջ զարգացում կապրեն:
