Իսկ իրական շտեմարանները կլինեն դեկտեմբերին
Գնահատման եւ թեստավորման կենտրոնի տնօրեն Գուրգեն Խաչատրյանը երեկ պաշտոնապես հայտարարեց, որ մաթեմատիկա առարկայի շտեմարանների առաջին մասը պատրաստ կլինի առաջիկա շաբաթվա ընթացքում, իսկ հայոց լեզու եւ գրականություն առարկայինը՝ մինչեւ դեկտեմբերի վերջ: Նա նշեց, որ վարչապետի մոտ ունեցած խորհրդակցության ժամանակ որոշվել է ընդունելության քննությունները հեշտացնել ու հնարավորինս կանխատեսելի դարձնել: Դրանից հետո որոշել են շտեմարաններ հրատարակել, որոնց հիման վրա էլ կկազմվեն քննական թեստերը: Ամենաաղմկահարույց՝ հայոց լեզու եւ գրականություն առարկայի շտեմարանները վերջնական տեսքի բերելուց առաջ ԳԹԿ-ն խորհրդակցել է ոլորտի մասնագետների հետ, նույնը նաեւ մաթեմատիկա առարկայի պարագայում: Պատրաստ են նաեւ բոլոր առարկաների գծով ուղեցույցները, որոնք առաջիկայում անվճար կտրամադրվեն բոլոր դպրոցներին: Ինչ վերաբերում է շտեմարաններին, դրանք կվաճառվեն որոշ գրախանութներում, մնում է, որ կառավարությունը որոշի գինը: ԳԹԿ տնօրենը նշեց, որ ամենայն հավանականությամբ մեծ թվաքանակ ունեցող թեստերը դարձյալ Լոնդոնում կտպագրվեն. «Կոռուպցիոն ռիսկը միշտ էլ կա, պետք չէ շտապել»: Գ. Խաչատրյանից հետաքրքրվեցինք՝ ինչպե՞ս լուծվեց հայոց լեզու եւ հայ գրականություն առարկայի՝ շրջանառության մեջ դրված, այսպես ասած, կեղծ շտեմարանի ճակատագիրը, որի մասին ԳԹԿ-ն ահազանգել էր «Առավոտին», իրավապահ մարմիններին: «Հենց տեղեկացանք, մեր աշխատակիցներին ուղարկեցինք մարզեր, այդ «Շտեմարանը» վերցրին, բերեցին: Մենք հայտարարեցինք, որ դա այն շտեմարանը չէ, որ ԳԹԿ-ն է ստեղծել: Նմանակումը չափից դուրս շատ էր ու շփոթության մեջ էր գցում դիմորդներին, դրա համար դիմեցինք նաեւ համապատասխան մարմիններին: Արդյունքում՝ կասեցվել է այդ շտեմարանների տպագրությունը, կարծեմ թե վերնագիրն էլ դարձրել են թեստերի ժողովածու եւ ոչ թե շտեմարան»,- հայտնեց նա:
ԳՈՀԱՐ ՀԱԿՈԲՅԱՆ
«Առավոտ» օրաթերթ
