Քաղծառայության քննությունում հաղթողներ չեն լինում, հենց այն մասնագիտությունների գծով, որտեղ ավելի շատ շրջանավարտներ են լինում. այսօր «Հայելի» ակումբում ասաց ՀՀ քաղաքացիական ծառայության խորհրդի նախագահ Մանվել Բադալյանը: Ըստ նրա, 2011 թվականին անցկացված ամեն 5-րդ մրցույթում չեն լինում հաղթողներ: Թե կոնկրետ ո՞ր մասնագիտությամբ անձինք չեն հաղթահարում քննությունը, Aravot.am-ի այս հարցին պարոն Բադալյանը պատասխանեց. «Տնտեսագետներ, հաշվապահներ, իրավաբաններ, ֆինանսիստներ: Սրանք այն մասնագիտություններն են, որ ավելի շատ շրջանավարտներ են լինում: Տասնյակ հազարավոր դիպլոմներ կան այս մասնագիտությունների, սակայն որակն այն չէ: Խոսում ենք աշխատատեղ չկա եւ այլն, մրցույթ ենք հրապարակում ու երկրով մեկ հայտարարում, խնդրում՝ կանչում ենք, որ գան մասնակցեն, բայց ամեն 5 մրցույթից մեկում հաղթող չի լինում: Լուրջ մասնագետները չեն էլ գալիս: Բայց չասենք, թե՝ բոլորը դիլետանտ են ու թույլ»:
Քաղծառայության խորհրդի նախագահի մեկնաբանմամբ՝ լավ մասնագետներից շատերը պարզապես իրենց չեն դիմում, քանի որ պետական ոլորտում վարձատրությունը ցածր է. «Լավ մասնագետներն իրենց թանկ են գնահատում, գնում են մասնավոր ընկերություններ: Լինում են նաեւ նեղ մասնագիտական պաշտոններ, որ մասնագետի կարիք կա, իսկ այդպիսի մասնագիտությամբ սակավ մարդիկ կան: Օրինակ՝ միջուկային անվտանգության գծով մասնագետ»:
Նելլի ԲԱԲԱՅԱՆ
