Այսօր Սյունիքի մարզպետ Սուրեն Խաչատրյանի դեմ հարուցված քրգործը կարճվել է, եւ այդ առնչությամբ Aravot.am-ը «Ժառանգության» պատգամավոր Զարուհի Փոստանջյանից հետաքրքրվեց, թե աղմկահարույց միջադեպի նման ավարտը սպասելի՞ էր: Ըստ նրա, ընդհանրապես այս պատմությունը շատ մութ կողմեր ունի. «Սիլվա Համբարձումյանի բողոքը, իր արած հայտարարությունները տարօրինակ էին: Ի սկզբանե ես հասկացա, որ ինչ–որ բան այն չէ: Նրա բողոքներն ազնիվ դրդապատճառներից չէին հնչում: Անհասկանալի շատ բաներ կային, սկզբում ասում էին՝ տեսախցիկները չէին ձայնագրել, հետո այլ բան ասացին: Սիլվան ինքն է որոշել բողոքել, ինքն էլ երեւի որոշել է ներել: Նա համենայնդեպս իր իրավունքների սահմանում է գործել, Սուրեն Խաչատրյանին ներել–չներելը իր գործն է: Միգուցե տուժողը գտել է, որ այդ ծեծով կամ ապտակով Սուրեն Խաչատրյանն իրեն ցավ չի՞ պատճառել, ես չգիտեմ»:
Ըստ Զարուհի Փոստանջյանի, որեւիցե մեկի նկատմամբ բռնություն կիրառելն, իհարկե, անտեղի է, իսկ Սուրեն Խաչատրյանի դեպքում, դա հատկապես իրավաչափ չի եղել, քանի որ նա, տարածված տեղեկատվության համաձայն՝ ոչ թե պաշտպանվել է, այլ ընդհակառակը՝ հարձակվել է կնոջ վրա. «Ես շատ բացասական եմ վերաբերվում նրա արածին, հատկապես եթե պաշտոնյա է, պետք է ավելի զսպված լիներ ու գիտակցեր, որ հասարակությունն իր նկատմամբ ավելի ուշադիր է, եւ նրա գնահատականը ավելի սուր ու քննադատաբար է լինելու»:
Զարուհի Փոստանջյանն ավելացրեց, որ ընդհանրապես մասնավոր մեղադրանքի գործերով, եթե կողմերն իրար հետ համաձայնվում են՝ գործը կարճվում է. «Պետությունն այդտեղ որեւէ միջամտություն չի կարող իրականացնել, եթե հանրային մեղադրանքի գործ լիներ՝ պետությունն իր պարտավորությունը կունենար: Տվյալ դեպքում արդեն իրենք իրար մեջ վեճ չունեն եւ պետությունն իրավունք չունի միջամտելու:
Եթե Սուրեն Խաչատրյանն իր ծեծով հասարակական կարգը խախտեր «Մարիոթում», դա կորակվեր խուլիգանություն եւ արդեն անկախ նրանից, թե Սիլվա Համբարձումյանը կբողոքեր, թե ոչ, բողոքը հետ կվերցներ կամ կհաշտվեր՝ պետութունն իր պատժամիջոցները կկիրառեր: Բայց այս դեպքում դատավարական գործում այլ ընթացակարգ էր»:
Կարդացեք նաև
Հռիփսիմե ՋԵԲԵՋՅԱՆ
