Փետրվարի 12-ին Իջեւանի տարածաշրջանի Խաշթառակ գյուղում կկայանան համայնքի ղեկավարի ընտրություններ: Հունվարի 8-13-ը թեկնածուները պետք է գրանցման համար փաստաթղթեր ներկայացնեն Տավուշի մարզի թիվ 40 ընտրատարածքային ընտրական հանձնաժողով (կենտրոնը` Նոյեմբերյան): Հունվարի 11-ի դրությամբ, գրանցման համար անհրաժեշտ փաստաթղթեր ներկայացրել էր միայն 2008 թվականից համայնքը ղեկավարող, հանրապետական Հայկ Քամալյանը: Նրա թեկնածությունն առաջադրել է ՀՀԿ Իջեւանի շրջանային կազմակերպությունը: 55-ամյա
Հայկ Քամալյանը մեր զրույցում ասաց, որ ապավինում է համագյուղացիների աջակցությանը, քանի որ կանգնած է նրանց կողքին, գյուղապետի աշխատանքից զատ, որպես շինարար եւ եռակցող, մշտապես օգնել է համագյուղացիներին: Խաշթառակում գործող գյուղապետի թեկնածության առաջադրումը ՀՀԿ-ի կողմից հավանաբար պայմանավորված է նրանով, որ նախկին գյուղապետ, այժմ գյուղապետի հավանական թեկնածու Արթուր Վանեսյանը նույնպես ՀՀԿ անդամ է: Հավանաբար, իշխող կուսակցությունը ցանկանում է հստակ ցույց տալ իր դիրքորոշումը:
Բացի այդ, սպասվում է, որ գյուղապետի թեկնածու կառաջադրվի նաեւ ԲՀԿ անդամ Անդրանիկ Վիրաբյանը:
Կարելի է կարծել, որ հանրապետականները դաս են առել նոյեմբերի 13-ին Իջեւանում կրած պարտությունից: Հիշեցնեմ, որ այդ ժամանակ ՀՀԿ անդամ, նախկին քաղաքապետ Վարուժան Ներսիսյանն ինքնաառաջադրվել էր, հանրապետականը նրան գործնականում չսատարեց ու նա պարտվեց ԲՀԿ-ական Վարդան Ղալումյանին:
Կարդացեք նաև
Ոսկան ՍԱՐԳՍՅԱՆ
