73 տարվա դեգերումներից հետո «Լոռի-Փամբակ» երկրագիտական թանգարանն իր տանիքն ունեցավ: Երբ գումարը կար, Լոռու մարզպետարանը 3 տարբերակ առաջարկեց՝ ՀՀ ագրարային համալսարանի Վանաձորի մասնաճյուղի մասնաշենքը, որը գտնվում է քաղաքի բարձրադիր թաղամասում, առանձին կառույց, որը պետք է լիներ քաղաքի ծայրամասերից մեկում եւ թանգարանի ներկայիս հասցեն՝ Դեմիրճյան 23-ը: Նպատակահարմար ու քաղաքի կենտրոնին մոտ լինելու պատճառով ընտրվեց վերջին տարբերակը: Ի դեպ, այս տարածքն արդեն քանի տարի փորձում են հարմարեցնել թանգարանային պայմաններին, սակայն գումար չլինելու պատճառով՝ անընդհատ ձգձգվում էր հարցը:
Լոռու մարզպետարանի կրթության, մշակույթի, սպորտի վարչության առաջատար մասնագետ Մհեր Մելիքյանը մեզ հետ զրույցում ասաց, որ. «Դեռեւս լուրջ կահավորանքի անհրաժեշտություն կա, դիզայներ-մասնագետի կարիք է զգացվում, որպեսզի ցուցանմուշներն իրենց տեղը գտնեն, եթե իր տեղում չլինի, կարող է նաեւ չնայվել»:
«Լոռի-Փամբակ» երկրագիտական թանգարանի տնօրեն Նաիրա Առաքելյանն էլ նշեց, որ մակերեսն այնքան է, որ հնարավոր է ցուցադրվի ավելին, քան ցուցադրվել է, բարձրության եւ լուսավորության խնդիրն է ապահովված ու կա դահլիճ, որը հնարավորության կտա ավելի լավ ցուցադրել նմուշները. «Իհարկե կան թեմաներ, որոնք տնակային խոնավ պայմաններում կորցրել են իրենց տեսքը, սակայն օդին եւ ջերմաստիճանին հարմարվելուց հետո միայն պարզ կդառնա, թե որ նմուշը ինչ վերանորոգման պետք է ենթարկվի»:
Կարդացեք նաև
Մեծ տարածքի պատճառով թանգարանում գիտաշխատողների կարիք էլ կա: Ներկայումս 12 աշխատող, 2 գիդ, 2 ֆոնդապահ ունի թանգարանը: Տնօրենը հույս ունի, որ բազմիցս որպես հարց բարձրացված գիտաշխատողի հաստիքն էլ կունենան: Աշխատակիցներին մտահոգող մի խնդիր էլ կա. աշխատավարձը, որը չի հատում անգամ 40 հազարի սահմանը:
Տնակային պայմանները խանգարել են հստակ գնացուցակ ունենալուն, քանի որ այցելուները դպրոցականներն ու արտերկրից ժամանած հյուրերն են եղել, այժմ գնացուցակը մշակվում է ըստ խմբերի: Սակագներ կսահմանվեն դպրոցականների, ուսանողների, քաղաքացիների, օտարերկրյա զբոսաշրջիկների համար:
Որ այսուհետեւ թանգարանի այցելուների թիվը կփոխվի, համոզված է Լոռու մարզպետ Արթուր Նալբանդյանը. «Մարզպետարան եկած պատվիրակներին անպայման կուղեկցենք թանգարան, սա ոչ միայն քաղաքի, այլեւ մարզի այցեքարտն է»:
ՆԵԼԼԻ ԴԱՎԹՅԱՆ
«Առավոտ» օրաթերթ
