Այսօր ԴԱՀԿ-ում կայացած խորհրդակցությունից հետո ԴԱՀԿ ղեկավարը` Միհրան Պողոսյանը, պատասխանելով լրագրողների հարցերին` իր բիզնեսների եւ հետագա պլանների մասին, ասել է, որ այն բանից հետո, ինչ 2007-ին նշանակվեց ՀՀ գլխավոր հարկադիր կատարող, վաճառեց իր բիզնեսները, եւ հիմա ոչ մի բիզնես չունի, իսկ իր եկամուտի ու ֆինանսական ապահովվածության աղբյուրը միայն անշարժ գույքն է. «Ես միայն «Քեթրին»-ի ու որոշ խանութների շենքերի սեփականատերն եմ, որոնք վարձով եմ տվել: Դրանք ինձ բավարարում են»:
Ինչ վերաբերում է խոսակցություններին` պատգամավոր դառնալու մտադրության կամ ՀՀ նախագահի վերահսկողական ծառայության ղեկավար դառնալու մասին, ապա, Միհրան Պողոսյանը հերքեց այդ լուրերի հավաստիությունը` ասելով, որ նման բաներ ինքը միայն մամուլից է իմանում:
Կայացած խորհրդակցության ընթացքում ամփոփվել են ԴԱՀԿ ծառայության գործունեության 2011թ. գործունեության արդյունքները: Ըստ այդմ`2011թ. բռնագանձումների և վերականգնումների ծավալը գերազանցել է 14 մլրդ դրամի սահմանագիծը, հարուցվել է 91.604 կատարողական վարույթ՝ նախորդ տարվա 83.310-ի դիմաց, աճը կազմել է 110%։
